Vit i rendimenteve rekorde të grurit. – Drejtorati për Bujqësi dhe Zhvillim Ekonomik me kohë ka bërë të gjitha parapërgatitjet për mbarëvajtjen e fushatës së korrje-shirjeve. Fushata e korrje-shirjeve ka filluar me datën 9 korrik 2011 dhe ky proces ka shkuar sipas planit dinamik të hartuar nga DBZHE. Këtë verë për t’u korrur në Komunën tonë ishin 4710 ha, ku për korrjen e kësaj sipërfaqeje ishin të angazhuara 90 autokombanja. Në bazë të vlerësimeve dhe informatave nga tereni këtë vit janë arritur rendimente mjaftë të larta ku mesatarja është 4750/1 ha.
Vlenë të theksohet se për një rendiment të lartë që është arritur ka ndikuar shumë faktor, si kushtet e volitshme atmosferike dhe masat e avansuara agroteknike si dhe subvensionimet në këtë lëmi që janë stimulim i mirë për farmerët që merren me kultivimin e kësaj kulture.
U ndanë 30 serra për farmerët e Komunës së Drenasit. –Në vazhdën e aktiviteteve të këtij Drejtorati për zhvillimin e përgjithshëm të prodhimtarisë së perimkulturave janë ndërtuar 30 serra të tipit tunel për ata farmerë të përzgjedhur nga ana e komisionit përkatës të Komunës. Në këtë projekt në vlerë prej 30 mijë eurosh, Komuna ka subvensionuar me 80 % të projektit dhe 20 % farmerët.
Trajnime në Qendrën e Biznesit “One stop shop”. – Me hapjen e Qendres së Biznesit në Komunën tonë është krijuar një ambient shumë më i volitshëm për regjistrimin dhe liqencimin e bizneseve të lëmive të ndryshme ku përveq këtyre shërbimeve në këtë Qendër, bizneseve iu ofrohen edhe këshillime dhe trajnime me qëllim të avansimit të njohurive për hartimim e planbizneseve si dhe menagjimin e tyre. Gjatë muajit që lamë pas në këtë Qendër është organizuar një trajnim për biznese fillestare dhe ato ekzistuese ku morën pjesë 39 biznese, të cilët kanë fituar njohuri rreth hartimit, menaxhimit dhe zhvillimit të përgjithshëm për bizneset ekzistuese dhe ato të reja. Me këtë rast pjesëmarrësit në këto trajnime janë paisur me qertifikata të cilat ju kanë dhënë në një ceremoni të organizuar nga MTI, BSCK dhe KE.
Stop degradimeve të mjedisit në Komunën e Drenasit.- Pas nënshkrimit të Memorandumit të Mirëkuptimit në mes KPMM dhe Komunës së Drenasit, në mënyrë që të merren masa riguroze sipas Ligjit për Miniera dhe Minerale për të gjithë operatorët ilegal për ndërprerjen e degradimeve mjedisore si dhe rehabilitimin e tyre, Komuna e Drenasit ka ndërmarrë edhe hapa tjerë, ku me propozim të DBZHE, Bordi I Drejtorëve ka marrur vendim që të ndërpritet dhënja e pëlqimeve për shfrytëzim të gurit dhe zhavorit në lokacionet e zonave kadastrale Korroticë e Epërme ku parashihet që të ndërtohet zona ekonomike në sipërfaqe prej 106 ha. Për një menaxhim shumë më të planifikuar dhe të arsyeshëm, Komuna e Drenasit do të hartoj projektin e nevojshëm sipas Ligjit për Miniera dhe Minerale për tu liqencuar për shfrytëzimin zejtar ku me këtë rast përveq ndërprerjes së degradimeve mjedisore Komuna do të bëjë edhe rehabilitimin e këtyre sipërfaqeve të degraduara përmes rrafshimit të tyre, mbushjes me dhe, dhe pyllëzimit e gjelbërimit të tyre.
