Veseli, Gashi dhe Lladrovci vizitojnë vendin ku do të ndërtohet stadiumi kombëtar
Kryetari i Kuvendit, Kadri Veseli, ministri i Kulturës, Kujtim Gashi dhe kryetari i Komunës së Drenasit, Ramzi Lladrovci, kanë vizituar vendin ku do të ndërtohet Stadiumi Kombëtar, ku nga aty kanë njoftuar se këtë vit do të prezantohet projekti i fizibilitetit, ndërsa nga viti i ardhshëm do të nisin edhe punimet për ndërtimin e tij.
Kryetari Veseli, ka thënë se Stadiumi Kombëtar do të jetë më i mirë në regjion dhe nga ky vend, djelmoshat e kombëtares do të shënojnë edhe historinë. “Ky stadium do të jetë më standardet më të larta dhe të njëjtën kohë do të shënohet historia dhe djelmoshat tanë do të shënojnë suksese historike për reprezentacionin e Republikës së Kosovës. Drenasi është duke ecur përpara dhe ne këtë vend do të këtë investime të mëdha, ku përveç ndërtimit të Stadiumit në 27 hektarë, vetëm pak me poshtë do të ndërtohet qendra e re e biznesit e cila do të gjeneroj vende të reja të punës dhe zhvillim të qëndrueshëm ekonomik. Liberalizimi i vizave do të ndodh, por ne jemi duke punuar që rinia jonë të qëndrojë ne Kosovë” ka thënë kryetari Veseli.
Ministri i Kulturës, Rinisë dhe Sportit, Kujtim Gashi ka thënë se ndërtimi këtij stadiumi qe do të këtë 25 deri në 30 mijë ulëse dhe se është investimi më i madh në infrastrukturën sportive. Gashi ka njoftuar se janë zhvilluar procedurat për përzgjedhjen e kompanive që do të bëjnë studimin e fizibilitetit dhe janë përzgjedhur 6 kompani shumë prestigjioze ne rrethin e ngushtë për të hartuar projektin e stadiumit dhe është fat i mirë që ne këtë konkurs kemi pasur kompani të tilla. “Falënderoj kryetarin e Kuvendit, Kadri Veseli që vazhdimisht ka qenë i interesuar që këtë projekt të qoj përpara dhe të njëjtën kohë, falënderoj edhe kryetarin e Komunës, Ramiz Lladrovci i cili ka qenë jashtëzakonisht bashkëpunues dhe i gatshëm që këto parcela të cilat do t’i shfrytëzojmë për ndërtimin e stadiumit, me kohe i ka kryer të gjitha procedurat ligjore, dhe sot sa i përket pjesës administrative gjithçka është e gatshme” , ka vlerësuar ministri Gashi.
Kryetari i Komunës, Ramiz Lladrovci ka falënderuar kryetarin e Parlamentit, Kadri Veseli për iniciativën që stadiumi nacional të ndërtohet në Drenas. “Jo vetëm Drenasi, por gjithë qytetarët e Republikës së Kosovës janë me fat që Stadiumi nacional do të ndërtohet ne këtë pjesë. Ne kemi pasur një bashkëpunim shumë të mirë me ministrin Kujtim Gashi dhe tani ky territor dhe këto parcela janë në pronësi të Ministrisë së Kulturës për ndërtimin e stadiumit dhe Komuna e Drenasit siç është zotuar, do të vazhdojë t’i ndihmojë me infrastrukturë ligjore për realizmin e këtij projekti. Drenasi po behët atraktiv, tërheqës për investitor dhe me një zhvillim te qëndrueshëm ekonomik, jo vetëm për Drenasin, por për të gjitha Komunat përreth dhe vendin. Sot kam marr njoftimin nga Ministri Bedri Hamza se është vendosur se do të ndërtohet liqeni akumulues në Vërboc i cili do të shërbejë për pije për 40 mijë banorë, ndaj falënderoj, kryetarin Veseli, ministrin Gashi e Hamza dhe gjithë ata që janë duke ndihmuar qe Drenasi po behët një vend me zhvillim ekonomik dhe krijimin e vendeve të reja të punës”, ka thënë kryetari Lladrovci.
