Në kuadër të realizimit të projekteve infrastrukturore, Drejtori i Urbanizmit, z.Betim Berisha me bashkëpunëtorë kanë inspektuar punimet në lagjet e fshatit Dobroshec, Çikatovë e Vjetër dhe Poklek i Vjetër.
Në kuadër të realizimit të projekteve kapitale të planifikuara për vitin 2015, kanë përfunduar punimet në asfaltim të rrugëve dhe kanalizim në disa lagje të fshatrave, ndërsa disa të tjera janë afër finalizimit. Ka përfunduar asfaltimi i rrugës në lagjen Morina e Kastrati të fshatit Dobroshec, ndërsa është afër finalizimit në kuadër të këtij projekti edhe asfaltimi i rrugës në lagjen Prenku dhe Shehu te po këtij fshati. Në projektet e investimeve kapitale për përmirësimin e infrastrukturës në fshatin Dobroshec, ky lokalitet do të përfitoj këtë vit edhe ndërtimin e kanalizimit ne vlerën prej 40 mijë eurove, apo 3500 metra rrjet të kanalizimit, ndërsa në fazën e prokurimit është edhe ndërtimi i urës në lagjen Avdyli. Me miratimin e buxhetit për vitin e ardhshëm për këtë fshat po ashtu janë ndarë 80 mijë euro në infrastrukturë. Ka përfunduar po ashtu edhe asfaltimi i rrugës ne gjatësi prej 1500 metrave në Poklek të Vjetër që ka kushtuar 112 mijë euro. Ndërtimi i kësaj rruge ka lehtësuar qarkullimin e banorëve të lagjes Bucolli dhe Ceravadiku për 3 kilometra. Asfaltimi i rrugës prej 1000 metrave ka përfunduar edhe në fshatin Çikatovë e Vjetër ne vlerën prej 80 mijë eurove, përkatësisht në lagjen Dervishi, Karaxha e Makolli e gjithashtu ka përfunduar edhe faza e parë e kanalizimit në këtë fshat dhe faza e dytë është planifikuar të përfundojë vitin e ardhshëm. Komuna e Drenasit, javën që lamë ka miratuar buxhetin për vitin 2016 dhe vlera e investimeve kapitale ka shënuar një rritje, ku janë planifikuar 3 milion e gjysmë në infrastrukturë ( rrugë, kanalizim e ujësjellës).
