Komuna e Drenasit, përkatësisht Drejtoria për Shërbime Publike dhe Emergjencë, ka mbajtur konsultimin publik për Draft-Planin Komunal për Transportin Lokal në Komunën e Gllogocit 2026–2031, dokument i cili është në fazën e konsultimit publik deri më 20 korrik 2026.
Takimin e hapi Udhëheqësi i Zyrës për Komunikim me Publikun, Bekim Dobra, i cili njoftoi të pranishmit për qëllimin e konsultimit publik, rëndësinë e përfshirjes së qytetarëve dhe grupeve të interesit në procesin e hartimit të dokumenteve strategjike, si dhe afatet ligjore për paraqitjen e komenteve dhe sugjerimeve.
Drejtori i Drejtorisë për Shërbime Publike dhe Emergjencë, Nexhmedin Gruda, falënderoi të gjithë pjesëmarrësit për kontributin dhe interesimin e treguar, duke theksuar se vërejtjet dhe propozimet e qytetarëve do të trajtohen me seriozitet gjatë finalizimit të dokumentit.
Më pas, Shefi i Sektorit në Drejtorinë për Shërbime Publike dhe Emergjencë, Afrim Prokshi, prezantoi në detaje Draft-Planin Komunal për Transportin Lokal 2026–2031, duke shpalosur objektivat, prioritetet dhe masat e parapara për zhvillimin e transportit lokal në komunë gjatë periudhës së ardhshme.
Në konsultimin publik morën pjesë anëtarët e grupit punues për hartimin e planit, qytetarë si dhe përfaqësues të vendbanimeve të Komunës së Drenasit, të cilët patën mundësi të paraqesin komentet dhe sugjerimet e tyre lidhur me dokumentin.
Komuna e Drenasit rikujton se Draft-Plani Komunal për Transportin Lokal 2026–2031 mbetet i hapur për konsultim publik deri më 20 korrik 2026, ora 16:00, dhe fton të gjithë qytetarët, përfaqësuesit e institucioneve, bizneset, organizatat e shoqërisë civile dhe palët e tjera të interesit që të japin kontributin e tyre përmes komenteve dhe sugjerimeve.
