Në Sallën e Kuvendit të Komunës së Drenasit është mbajtur dëgjimi publik për Kornizën Afatmesme Buxhetore — KAB 2027–2029.
Ky takim u udhëhoq nga nënkryetari i Komunës së Drenasit, Arben Shala, ndërsa pjesëmarrës ishin përfaqësues të grupeve të ndryshme të komunitetit, përfshirë administratë të vendbanimeve, këshilla lokale, gra, të rinj, studentë, pensionistë, drejtorë të shkollave, mësimdhënës, biznese, fermerë etj.
Gjatë takimit, qytetarët patën mundësi të paraqesin kërkesat, ankesat, shqetësimet dhe sugjerimet e tyre lidhur me nevojat e komunitetit dhe prioritetet që duhet të merren parasysh në planifikimin buxhetor për periudhën 2027–2029. Diskutimet u fokusuan në çështje që lidhen me përmirësimin e shërbimeve publike, zhvillimin lokal, investimet në vendbanime dhe përfshirjen më të madhe të qytetarëve në vendimmarrje.
Qëllimi i këtij dëgjimi publik ishte përfshirja e qytetarëve në procesin e planifikimit buxhetor afatmesëm, duke u dhënë mundësi të kontribuojnë me propozime konkrete për prioritetet zhvillimore të Komunës së Drenasit.
Komuna e Drenasit ka theksuar rëndësinë e pjesëmarrjes qytetare në vendimmarrje, me synim ndërtimin e një buxheti më transparent, më gjithëpërfshirës dhe në shërbim të të gjithë qytetarëve.
Takimi është mbajtur sot, në Sallën e Kuvendit, duke filluar nga ora 14:00.
