Muaji tetor është muaji i fushatës ndërkombëtare që ka për qëllim sensibilizimi dhe ndërgjegjësimi për zbulim të hershëm, trajtim të kancerit të gjirit dhe për kujdes shëndetësor të grave dhe vajzave në gjithë botën.
Edhe në Komunën e Drenasit, stafi i Zyrës për Barazi Gjinore në bashkëpunim me Qendrën për Promovimin e të Drejtave të Grave, respektivisht drejtoreshën Kadire Tahiraj, dhe shoqërinë civile kanë mbajtur një sesion informues lidhur me kancerin e gjirit.
Të pranishmit i përshëndeti kryetari i Komunës së Drenasit, Ramiz Lladrovci. Ndër të tjera, kryetari Lladrovci theksoi rëndësinë e diagnostikimit të hershëm të kancerit të gjirit dhe për rëndësinë që Komuna e Drenasit i kushton kësaj çështje dhe qasjen më të lehtë në diagnostifikim pasi që tani QKMF-ja e Drenasit posedon mamograf.
Radiologu Shkëlzen Gashi, nga Qendra Komunale e Mjekësisë Familjare në Drenas, ofroi për të pranishmet informacione lidhur me zbulimin e hershëm të kancerit të gjirit dhe rëndësinë e parandalimit përmes diagnostikimit të kësaj sëmundje, edhe duke përcjellë informacionet për gjeneratat e reja, që ato të vetëdijesohen se si mund të bëjnë vetëkontrollë dhe të shtojnë vetëkujdesin për shëndetin personal.
Për shkak të pandemisë këtë vit nuk ishte e mundur që të bëhet ecja tradicionale kundër kancerit të gjirit.
Për çdo vit, fushata e kancerit të gjirit fillon më 1 tetor dhe përfundon më 31 tetor.
