Serish largohen mbeturinat e deponisë inerte në fshatin Llapushnik
Komuna e Drenasit, përkatësisht Drejtoria e Shërbimeve Publike dhe Emergjencë, sërish ka bërë largimin e mbeturinave në pjesën hyrëse dhe jashtë rrethojës së deponisë inerte në fshatin Llapushnik.
Kjo është hera e katërt që DSHPE-ja bënë largimin e mbeturinave në Llapushnik, ndaj ju bëjmë thirrje qytetarëve që mbeturinat inerte t’i hedhin në pjesën e brendshme (pasi që ekziston hapësirë e mjaftueshme). Hedhja e mbeturinave në mënyrë jo adekuate, paraqet problematikë duke bllokuar pjesën e brendshme të saj dhe duke e bërë jo funksionale deponinë.
Me qëllim të parandalimit të hedhjes së mbeturinave jashtë rrethojës, deponia do të jetë në mbikëqyrje të vazhdueshme nga inspektorati në bashkëpunim me zyrtarët e DSHPE-së, në mënyrë që të parandalohet hedhja e mbeturinave në hyrje dhe jashtë saj, ku për të gjithë ata të cilët praktikojnë një gjë të tillë do të merren masa sipas ligjeve në fuqi, pasi që deponia inerte në fshatin Llapushnik është e mbuluar edhe me kamera të sigurisë.
Kujtojmë se kjo deponi, është caktuar nga Komuna e Drenasit për hedhjen e mbeturinave inerte nga qytetarët, në mënyrë që të parandalohet krijimi i deponive ilegale me përmbajtje të mbeturinave inerte-ndërtimore.
Inkurajojmë të gjithë qytetarët që mbeturinat inerte-ndërtimore t’i hedhin në pjesën e brendshme të deponisë, ndryshe do të pasojnë denime.
Deponia ka filluar së funksionalizuari për hedhjen e mbeturinave ndërtimore nga operatorët ekonomik e qytetarë, dhe është mirëmbajtur vazhdimisht me qëllim që mbeturinat ndërtimore të cilat janë dërguar, të sistemohen brenda deponisë.
Por ditët e fundit, nga vizitat që i janë bërë në terren dhe raportimeve nga ana e qytetarëve, është vërejtur se nga persona të papërgjegjshëm po behët hedhja e mbeturinave të llojeve të tjera, për çka nuk e ka destinim kjo hapësirë.
Prandaj, qytetarët nuk duhet të bien pre e manipulimeve nga personat e pandërgjegjshëm, të cilët vet i hedhin mbeturinat dhe pastaj të njëjtat i djegin duke tentuar që përmes këtij veprimi, të përdorin edhe për propagandë e në bashkëpunim me politikën.
Komuna e Drenasit është e njoftuar se kush janë personat e pandërgjegjshëm dhe ndaj tyre do të merren masa siç është e caktuar edhe me legjislacion. Drejtoria e Inspeksionit, disa herë ka shqiptuar edhe gjoba ndaj atyre që kanë hedhur mbeturina në vendet e ndaluara, dhe nga pamjet e kamerave mobile që posedon komuna, ndaj atyre do të vazhdohet me shqiptimin e gjobave.
