Në varrezat e fshatit Çikatovë e Vjetër të Komunës së Drenasit janë rivarrosur 20 mbetje mortore, të martirëve të identifikuar në Rudnicë të Rashkës dhe mbetjet mortore të Rrahman Nika në varrezat e fshatit Gllanasellë. Merrnin pjesë, kryetari i Komunës z. Nexhat Demaku, presidentja znj. Atifete Jahjaga, kryetari i Parlamentit, z. Kadri Veseli, deputet të Kuvendit të Kosovës, familjar të viktimave dhe mijëra qytetarë nga Kosova.
Çikatova e Vjetër e Komunës së Drenasit dhe fshati Gllanasellë kanë bërë rivarrimin e mbetjeve mortore të 21 martirëve të vrarë e zhdukur në vitin 1999 të cilët janë identifikuar në Rudnicë të Rashkës së Serbisë. Kryetari i Komunës së Drenasit z. Nexhat Demaku tha se fatkeqësisht ende nuk po gjykohen ekzekutuesit e këtyre vrasjeve për krimet e bëra gjatë luftës në Kosovë. Më këtë rast kryetari i Komunës ju drejtua të pranishmëve me këtë fjalë rasti; "Vetëm 10 ditë para 27 Prillit, Ditës së të Pagjeturve në Kosovë, Çikatova e Vjetër po rivarros familjarët, që ranë për lirinë e këtij vendi, duke i sjellë nga varreza masive e Rudnicës së Rashkës (Serbi). Data e 17 prillit është dëshmia më e madhe se serbët kryen masakrat më të rënda mbi popullatën e pafajshme të Kosovës, si në Çikatovë, ashtu edhe në Paklek. Sot para nesh qëndrojnë trupat e 21 familjarëve tanë, të cilët riatdhesohen nga varreza masive e Rudnicës së Rashkës, atje ku mbetjet e tyre nuk gjetën prehje për kaq vite. Të gjithë këta u morën nëpër shtëpi nga forcat serbe, u ekzekutuan me plumba në kokë e gjoks në mënyrën më barbare, thotë ekspertiza mjeko-ligjore. Trupat e tyre ishin varrosur natën pas ekzekutimit, por barbarët serbë, për të fshehur gjurmët e krimit dhe gjenocidit mbi vendasit shqiptarë, i zhvarrosin dhe dërgojnë në Rudnicë të Rashkës, ku i mbulojnë në një varrezë masive, bashkë edhe me trupat nga Rezalla e Zabeli i Poshtëm. Mirëpo, edhe pse dihen urdhëruesit dhe ekzekutuesit e tyre, deri më tani nuk është marrë asnjë hap për t’i gjykuar ata kriminelë e barbarë. Trupat e këtyre 21 martirëve dhe shumë të tjerëve kanë mbajtur plagët e hapura për 16 vite dhe fatkeqësisht ende po vazhdojnë. Ankthet e pritjes kanë qenë të gjata jo vetëm për familjarët, por për të gjithë neve deri në përmbylljen e plotë të identifikimit të këtyre familjarëve tanë, duke bërë që Çikatova të pushojë ankthin dhe stresin kaq të gjatë. Një falënderim të posaçëm meritojnë Komisioni Qeveritar për të Pagjeturit, Departamenti i Mjekësisë Ligjore, Organizata Ndërkombëtare e Kryqit të Kuq etj. për angazhimin e përkushtuar për të ardhur sot këtu. Shqetësimi për të përfunduar ky proces i stërzgjatur rëndon mbi të gjitha institucionet tona, por na mban shpresa se trysnitë mbi Serbinë do të japin rezultat që ankthi dhe pritja të përfundojë, siç ndodh edhe me 9 të pagjetur nga Pakleku i Ri prej 31 majit 1998, mjekun e luftës, dr Hafir Shala. Ne dimë që dhembja dhe kujtimi për të rënët do na përcjellë gjithë jetën së bashku, por kur kujtojmë edhe qëllimin e tyre të flijimit, na e lehtëson këtë dhembje. Edhe nëse dikush do të mundohej të na e gjykojë historinë dhe luftën e lavdishme, kontesti i gjithë asaj do të vinte pikërisht me shënimin e këtyre datave të lavdishme e sidomos ribashkimin e trupave të riatdhesuar në tokën tonë që çliruam me gjak. Institucionet tona do të jenë përherë mirënjohëse dhe falënderuese për familjet dhe viktimat që sollën lirinë pas një shekulli robërimi. Ju familjarë të familjeve Morina, Nika e Demaku duhet të mbaheni të fortë dhe të gjeni ngushëllim në faktin se, pavarësisht dhembjeve, Kosova sot është shtet i pavarur, sovran dhe frymon me idealin e atyre që dhanë jetën për këtë", tha kryetari Demaku. Ndërsa Prenk Xhetaj ne emër të Institucioneve të Republikës së Kosovës, tha se Komisioni për Persona të Pagjetur është duke punuar vazhdimisht që të identifikohen të gjithë trupat që mungojnë sot e 16 vite nga përfundimi i luftës. Ne emër të familjarëve ka folur Driton Morina.
