Komuna e Drenasit në bashkëpunim me organizatën gjermane GIZ, ndërmarrjen publike “Pastrimi”, dhe nëpërmes organizatës Qendra për Zhvillim dhe Edukimit të Mjedisit- CEDE, kanë përuruar tabelat informuese të cilat tregojnë që ndalohet hedhja e mbeturinave në vendet publike dhe se hedhja e mbeturinave është e ndaluar me ligj.
Ky përurim vjen pas aksionit të ndërmarrë për pastrimin e tri deponive ilegale të mbeturinave në Drenas. Në përurimin e këtyre tabelave, kryetari i Komunës së Drenasit, z.Nexhat Demaku, ka falënderuar organizatën GIZ që kanë mbështetur pilot projektin për sistemimin e ekonomive familjare në menaxhimin e mbeturinave. “Kjo tabelë e vendosur tregon më së miri se hedhja e mbeturinave në vendet publike është e dënuar dhe ju bëjë thirrje gjithë qytetarëve ta ruajnë ambientin e tyre. Projekti për menaxhimin e mbeturinave pas suksesit të pilot projektit në Komoran dhe Tërstenik do të vazhdoj të shtrihet edhe në vendbanime të tjera në Komunën tonë”, ka thënë Demaku. Driton Vatovci koordinator i projektit për menaxhimin e mbeturinave nga organizata GIZ, ka thënë se kjo organizatë përmes partneritetit me Komunën e Drenasit dhe Pastrimin ka treguar efekt në përmirësimin e menaxhimit të mbeturinave. “Ne i gëzohemi faktit që është rrit vetëdijesimi i qytetarëve duke ndikuar që ky pilot projekt të ketë sukses në këto dy fshatra, Komoran dhe Tërstenik, ndërsa do shikohen mundësit që në të ardhmen të shtrihen aktivitetet edhe në fshatra tjera në Komunën e Drenasit”, ka thënë Vatovci. Kurse menaxheri i ndërmarrjes “Pastrimi” në Drenas, Muhamer Qelaj, ka thënë se kjo ndërmarrje u ka ofruar të gjitha shërbimet teknike për finalizimin e këtij polit projekti.
