Prej datës 21 deri me datën 25 shtatorë në Drenas kanë jehuar vetëm këngët dhe vallet folklorike burimore shqiptare nga 47 ansamble, individ dhe grupe folklorike të cilit ishin pjesëmarrës në Revistën e Folklorit Burimor Shqiptarë “Drenasi 2010”. Pjesëmarrësit ishin nga të gjitha trevat shqiptare, Kosova, Shqipëria, Maqedonia dhe Mali i Zi.
Kryetari i komunës së Drenasit z.Nexhat Demaku në hapjen e festivalit pesë ditorë shtoi se ky edicion, konkretisht nata e parë është e veçantë për faktin se përkon me 50 vjetorin e mbrëmjes së parë burimore folklorike në Drenas. “Pas gjysmë shekulli Revista krijoj traditën e saj si festival mbarë kombëtar për të përcjell dhe transmetuar vlerat e krijimtarisë shpirtërore të popullit me shekuj”.
Pos revistës, gjatë këtyre ditëve u organizua edhe një tribunë shkencore “Gjendja e sotme e folklorit gojor muzikor “Rezultatet dhe Problemet”. Ndërsa në natën e fundit të Revistës, juria pas prezantimit të të gjitha ansambleve, individëve dhe grupeve folklorike shpërbleu më të mirët. Me vendin e tretë juria shpërblyen: SHKA “Jahi Hasani”, Çegran-Gostivar, SHKA “Shotë Galica”, Drenas, Ansambli Folklorik “Vaqe Zela”, Lushnje. Kurse me vendin e dytë u shpërblye Ansambli autokton “Rugova”, nga Peja dhe SHKA”Skampa”, nga Elbasani.
Vendin e parë e fitoi Ansambli i këngëve dhe valleve “Emin Duraku”, nga Zhuri. Ndërsa kurorën e Revistës së Folklorit Burimor Shqiptarë “Drenasi 2010”, e fitoi Shoqëria Kulturore “Bajram Curri”, Romaj- Prizren. Gjithashtu u ndanë edhe shumë çmime për personalitetet të cilët kanë dhënë kontribut në fushën e kulturës. Ndërkaq disa prej pjesëmarrësve fituan çmimin e karrierës dhe disa të tjerë çmimet speciale. Kryetari i komisionit Adem Zejnullahu theksoi se kjo pasuri e folklorit nga të gjitha viset shqiptare dëshmon vijëmësin e vet historisë së jetës ndër breza. Ai tha se këngët epike-lirike dhe vallet janë përfaqësuese në harmoni të plotë me instrumentet e vjetra tradicionale dhe veshjet që e ruajnë traditën e këtij festivali i cili është më i madhi pas atij të Gjirokastrës. “Çmimet u ndan me meritë për interpretimin e vlerave artistike, të folklorit tonë dhe të trashëgimisë sonë etno kulturore. Në mbarë Kosovën mbahen një numër i konsiderueshëm festivalesh, por ky festival është më i madhi në Kosovë, pas atij që mbahet në Gjirokastër dhe ky e mban emblemën e festivaleve më të cilën përfshihen shumë ansamble, grupe e interpretues të ndryshme dhe është gjithë kombëtar dhe uroj që edhe vitet e tjera të jetë edhe më gjithë përfshirës”, tha ai.
