Për përgatitjet e fillimit të vitit të ri shkollor 2011/2012 në institucionet e arsimit në Drenas, DKA ka shpallur dy konkurse për plotësimin e vendeve të lira të punës për mësimdhënës adekuat në institucionet edukatovo-arsimore. Në konkursin e rregullt janë intervistuar vetëm kandidatët adekuat për vendet e lira, ku janë pranuar 14 mësimdhënës, ndërsa në konkursin plotësues i cili është në fazën e shqyrtimit dhe intervistimit të kandidatëve kanë konkuruar 296 kandidatë për 94 vende të lira. Intervistat e kandidatëve fillojnë nga dita e enjte më, 18.08.2011 dhe do të zgjatin deri më, 23.08.2011 sipas orarit të publikuar nga DKA.
Në fund të muajit gusht do të mbahet afati i dytë i Testit të Maturës shtetërore, ku këtij testi do t’i nënshtrohen rreth 700 maturantë të dy shkollave të mesme të larta. Ndërsa gjithashtu ka filluar pranimi i nxënësve në afatin e dytë për klasat e dhjeta të arsimit të mesëm të lartë.
Në aspektin e përgatitjeve teknike, institucionet arsimore janë duke i përgatitur objektet, lyer, pastruar dhe dezinfektuar inventarin shkollor. Në aspektin e përmirësimit të infrastrukturës kanë përfunduar punimet në ndërtimin e objektit të ri të SHMT “Fehmi Lladrovci” në Drenas investim i MASHT-it. Objekti i ri shkollor pritet të pranohet teknikisht dhe të inaugurohet në fillim të muajit shtator të këtij viti. SHFMU “ Naim Frashëri “ në Bletar është në fazën përfundimtare ndërtimi i aneksit të shkollës dhe renovimi gjeneral i objektit të vjetër, ky projekt investohet nga Komuna e Drenasit në participim edhe me USAID-in Amerikan. Gjatë kësaj jave ka filluar renovimi në SHFMU “ Mehmet Gradica “ në Likoshan me ndërrimin e dyerve, dritareve, investimin e bënë Komuna e Drenasit.
Edhe për këtë vit shkollor jemi duke u përgatitur për pranimin e teksteve mësimore për nxënësit e arsimit të obliguar. Me ç’rast MASHT në bashkëpunim me DKA-në do t’i shpërndajë këto teksete në secilën shkollë.
