Komuna e Drenasit në bashkëpunim me GIZ-in dhe ndërmarrjen “Pastrimi”, zyrtarisht kanë filluar zbatimn e pilot projektit për grumbullimin e mbeturinave në Komoran dhe Tërstenik.
Në Drenas filloi zbatimi i pilot projektit për fshatrat Tërstenik dhe Komoran, me qëllim të ofrimit të shërbimeve për grumbullimin e mbeturinave, nga amvisëritë, shkollat dhe bizneset. Ky projekt synon që të ofrohen shërbime më efikase për banorët e këtyre dy fshatrave dhe të ketë rritje të shkallës së inkasimit të pagesave për shërbim. Me qëllim që në të ardhmen të zgjerohet shërbimi i ofrimit të grumbullimit të mbeturinave në të gjithë Drenasin.
Fillimisht u mbajt konferenca për media në sheshin “Fehmi Lladrovci” në Drenas, në të cilën z.Nexhat Demaku, kryetar i Komunës së Drenasit, tha se “ne po e fillojmë pilot projektin për menaxhimin e mbeturinave në dy bashkësitë më të mëdha në Komoran dhe Tërstenik dhe nga kjo presim që të vazhdoj në gjithë territorin e Komunës një gjë e tillë. Ne jemi duke u përpjekur ne vazhdimësi t’i përmirësojmë shërbimet komunale karshi kërkesave të qytetareve, për te pasur një ambient me te pastër dhe te shëndetshëm. Ndërsa Gabriele Becker, menaxhere e Modernizmit të Shërbimeve Komunale në GIZ, foli për arsyen e përzgjedhjes së këtij projekti dhe tha se, “sot po shpërndahen edhe 1200 kontejnerë, për ju qytetarë në mënyrë që të mbahet një ambient me i pastër prandaj është shume e rëndësishme edhe mbështetja e juaj.
Më pas, automjetet e kompanisë “Pastrimi”, së bashku me grupet organizative dhe grupet vullnetare, të shoqëruar nga Zjarrfikësit e Drenasit, Policia e Kosovës, Forca e Sigurisë së Kosovës dhe qytetarë të tjerë u nisën për të filluar aksionin.
Gjatë shpërndarjes së kontejnerëve kompania “Pastrimi” filloi nënshkrimin e kontratave për ofrimin e shërbimeve me qytetarë dhe biznese. Duke vazhduar me pastrimin e lagjeve , si dhe u arrit që të pastrohen hapësirat publike ku janë deponuar mbeturinat në mënyrë ilegale, duke filluar kështu nga lagjja e Ibriqëve për të vazhduar edhe në pikat tjera.
Këto u aktivitete u shënuan nga Komuna e Drenasit në bashkëpunim me organizatën gjermane GIZ, dhe nëpërmes Qendrës për Zhvillim dhe Edukim të Ambientit-CEDE, aktivitete këto të parapara edhe me Planin dhe Rregulloren Komunale për Menaxhimin e Mbeturinave.
