Komuna e Drenasit ka nisur procesin për legalizimin e objekteve të ndërtimit të cilat nuk kanë leje të ndërtimit. Fillimisht Drejtoria për Urbanizëm ka filluar procedurën e identifikimit të objekteve të ndertuara pa leje që janë identifikuar në hartën digjitale ortofoto të datës 30 gusht 2013 në Kosovë.
Sipas Ligjit për Trajtimin e Ndërtimeve pa Leje (nr.4/L-188), Drejtoria e Urbanizmit do të publikoj listën e objekteve pa leje e cila listë do t’i dorëzohet Ministrisë së Mjedisit dhe Planifikimit Hapësinor, pastaj do të informohen të gjithë qytetarët për procedurat e aplikimit dhe pas publikimit të kësaj liste ata të cilët nuk e gjejnë emrin e tyre në listë do të kenë kohë të paraqitën në Drejtorinë e Urbanizmit. Me këtë rast, Komuna e Drenasit fton të gjithë qytetarët të cilët janë duke ndertuar ose do të ndërtojnë objekte banimi ose afariste të lajmërohën për t’u paisur me leje të banimit apo afariste, të kundertën do të merrren parasysh ne Ligjin për trajtimin e ndërtimeve pa leje dhe do të konsiderohën si ndertime ilegale. Ligji për Trajtimin e Ndërtimeve pa Leje ka hyrë në fuqi me 5 shkurt 2014 dhe do të jetë në fuqi për tre vite, deri më 5 shkurt 2017.
