Është mbajtur takimi me qytetarët e Komunës së Drenasit për vetëdijesimin e kursimit të energjisë elektrike përmes projektit të Efiçiencës së Energjisë. Në këtë takim merrnin pjesë, përfaqësues të Institutit për Politika Zhvillimore (INDEP), përfaqësues nga Agjencia e Kosovës për Efiçiencë të Energjisë (AKEE), përfaqësues nga Komuna e Drenasit, drejtor të shkollave, qytetarë dhe përfaqësues të OJQ-ve. Fillimisht një prezantim për kursimin e energjisë elektrike përmes efiçiencës e ka bërë Rinora Gojani nga Instituti për Politika dhe Zhvillim, ku ka treguar rezultatet në objektet shkollore dhe ekonomive familjare që janë bërë investime të efiçiencës. Arsim Kuliqi nga Agjencia e Kosovës për Efiçiencë të Energjisë ka treguar obligimet që ka Kosova në fushën e Efiçiencës së Energjisë në Kosovë, ndërsa Afrim Prokshi nga Komuna e Drenasit ka bërë prezantimin për të arriturat e efiçiencës që janë përfunduar viteve të kaluara në objekte shkollore, shëndetësore dhe në sheshin "Fehmi Lladrovci", si dhe atyre projekteve që janë në prioritet për të ardhmen. Në fund të takimit janë parashtruar pyetje nga pjesëmarrësit. Kujtojmë që Komuna e Drenasit është përzgjedhur nga Ministria e Zhvillimit Ekonomik si më e suksesshmja në fushën e projekteve të Efiçiencës së Energjisë për vitin 2014, projekt i cili është mbështetur nga Agjencioni Austriak për Zhvillim (ADA), Komuna e Drenasit dhe nga ndërmarrja e Feronikelit.
