Të martën është mbajtur mbledhja e Shtabit Emergjent në Komunën e Drenasit, ku anëtarët e Shtabit Emergjent kanë diskutuar për gjendjen aktuale.
Mbledhjen e hapi Kryetari i Komunës, Ramiz Lladrovci, i cili i njoftoi të pranishmit me numrin aktual të të infektuarve dhe vendimet e fundit të nivelit qendror si dhe për hapat që duhet të ndërmerren me tutje në funksion të ruajtjes së shëndetit publik.
Lladrovci tha se si Shtab Emergjent Lokal dhe Qendër Operative Lokale që nga fillimi i pandemisë kanë pasur bashkëpunim të ngushtë me të gjithë akterët e tjerë relevant në funksion të ruajtjes dhe parandalimit të virusit COVID-19.
Ne kemi marrë masat e nevojshme që të prekurit të vetëizolohen, dhe të gjitha rastet e të infektuarve janë të identifikuara. Inspektorati dhe zyrtarët policorë po sigurojnë që këto raste të mos dalin nga izolimi shtëpiak, gjithmonë sipas rekomandimeve të IKSHP-së dhe MSH-së. Aty ku ka pasur nevojë për ndihmën tonë për pako ushqimore dhe higjienike, në bashkëpunim me Kryqin e Kuq i kemi ndihmuar. Me këtë rast kryetari Lladrovci u bën thirrje familjeve të izoluara që kërkesat e tyre t’i adresojnë përmes administratorëve të vendbanimeve.
Drejtori i Shëndetësisë, Arsim Haxhiu, i njoftoi anëtarët e Shtabit me statistikat e të infektuarve, me monitorimin, kontaktet dhe vizitat që u bëjnë ekipet shëndetësore. Ai tha se raste aktive janë 60. Prej tyre 12 raste janë të hospitalizuara në ShSKUK, ndërsa 48 raste janë në mbikëqyrjeje të Kujdesit Parësor Shëndetësor. Të gjitha rastet që janë në mbikëqyrjet të kujdesit parësor shëndetësor janë me terapi orale të ordinuar nga ShSKUK, ndërsa kërkesat e disa rasteve që kërkojnë nga Kujdesi Parësor Shëndetësor për terapi infuzive, nëse paraqitet nevoja duhet të trajtohen në ShSKUK ekskluzivisht.
Për momentin, nga stafi shëndetësor test pozitiv janë tre infermierë, dhe një mjek nga Kujdesi Parësor Shëndetësor në Drenas. Stafi i QKMF nuk është burim infeksioni sepse të tre infermierët kanë pasur kontakte paraprake dhe pushime mjekësore para testimit.
Kryetari Lladrovci adresoi shqetësimet e ngritura për ndërprerje furnizimi me ujë tek ujësjellësi si në Arllat, Poklek të Ri, Lagje të Feronikelit dhe një pjesë të fshatit Gllobar. Gjithashtu kërkoi që në bashkëpunim me KEDS-in të aktivizohet Stacioni i Pompimit në Poklek të Ri. Qeverisjet e kalauara kanë bërë shumë dëme të mëdha dhe keqpërdorime gjatë vendosjes së gypave, dhe për pasojë tani janë duke u zhvilluar hetime për këtë çështje. Gjithashtu edhe rezervuari i ujit në Kamenicë nuk i përmbushë kriteret e kërkuara të izolimit.
Drejtori i KRU “Prishtina”, dega në Drenas, Ismet Balija, tha se puna e kësaj kompanie ka hasur në pengesa pasi që një numër i konsiderueshëm i punëtorëve të kësaj kompani janë të infektuar dhe janë në vetëizolim. Disa nga punëtorët edhe pse kanë rezultuar negativë, vazhdojnë të kenë gjendje jo të mirë shëndetësore. Gjithashtu ai tha se ka edhe shpenzime jo racionale të ujit e cila vjen zakonisht nga pikat më të ulëta të cilët krijojnë pengesa për pikat më të larta dhe bëri thirrje që të kursehet uji. Ai tha se për shkak të mungesës së energjisë elektrike në stacionin e pompave në Bivolak ka pasur ndërprerje të shpeshta të furnizimit me ujë.
Ndërsa sa i përket ujësjellësit në Arllat dhe Gjergjicë, Balija tha se kjo kompani nuk ka informacionet e nevojshme si sasinë e ujit dhe informacionet tjera të nevojshme, dhe nuk është në menaxhim të ujësjellësit në Drenas.
