Para fillimit të mbledhjes së rregullt, anëtarët e Kuvendit të Komunës së Drenasit kanë mbajtur një minutë nderim me rastin e 27-vjetorit të rënies së heroit Ilaz Kodra, 42 dëshmorëve dhe mbi 280 martirëve, të rënë më 30 prill 1999 në fshatrat Vërboc, Shtuticë, Dashec, Baks, Gllobar, Tërstenik, Polluzhë dhe fshatrat përreth.
Mbledhja e rregullt e Kuvendit të Komunës së Drenasit është kryesuar nga Kryesuesi i Kuvendit, Burim Bujupi. Në këtë mbledhje morën pjesë Kryetari i Komunës së Drenasit, Ramiz Lladrovci, drejtorët e drejtorive komunale, si dhe anëtarët e Kuvendit Komunal.
Gjatë kësaj mbledhjeje janë shqyrtuar pikat e parapara në rendin e ditës, duke filluar me miratimin e procesverbalit të mbledhjes së rregullt të Kuvendit Komunal të datës 30.03.2026.
Me vota unanime janë miratuar:
Propozim-vendimi për miratimin e Planit Lokal të Veprimit në Mjedis 2026-2030;
Propozim-vendimi për miratimin e Planit Komunal për Ri-integrimin e qëndrueshëm të personave të riatdhesuar dhe integrimin e të huajve në Komunën e Drenasit/Gllogocit 2026-2028;
Propozim-vendimi për lejimin e bonusit të banimit për shfrytëzimin e banesave me qira nga tregu për familjet që nuk kanë mundësi financiare për pagesën e qirasë;
Propozim-vendimi për caktimin e anëtarëve të komisionit përzgjedhës për drejtor në institucionet publike edukativo-arsimore të Komunës së Drenasit;
Propozim-vendimi për formimin e Komisionit për plotësim-ndryshimin e Rregullores për Taksa, Tarifa, Ngarkesa dhe Gjoba;
Propozim-vendimi për rritjen dhe bartjen e të hyrave vetanake nga tejkalimi në vitin 2025 në vitin 2026, si dhe bartjen e fondeve dhe bilanceve të pashpenzuara të të hyrave vetanake nga viti fiskal 2025 dhe vitet paraprake në vitin 2026.
Ndërkaq, pika për themelimin e komisionit për vlerësimin e pronave të përfshira në vendimin për dhënien e pronave të paluajtshme komunale në shfrytëzim afatgjatë nuk ka marrë votat e nevojshme për miratim. Si rrjedhojë, nuk është proceduar për votim as pika pasuese, respektivisht propozim-vendimi për themelimin e Komisionit të Ankesave për shqyrtimin e ankesave të palëve në procedurën e dhënies në shfrytëzim afatshkurtër dhe afatgjatë të pronës së paluajtshme të komunës.
Në këtë mbledhje është prezantuar edhe Raporti Financiar Janar-Mars 2026, ku anëtarët e Kuvendit janë njoftuar lidhur me realizimin buxhetor për tremujorin e parë të këtij viti.
Mbledhja ka vazhduar me diskutime dhe shqyrtimin e çështjeve të ndryshme në interes të qytetarëve dhe funksionimit të institucioneve komunale.
