Mbahet mbledhja e rregullt e Këshillit Komunal për Siguri në Bashkësi

Të martën është mbajtur mbledhja e rregullt e Këshillit Komunal për Siguri në Bashkësi (KKSB), ku ishin të pranishëm të gjithë anëtarët e këtij Këshilli. Mbledhjen e ka kryesuar nënkryetari i Komunës së Drenasit, Arben Shala i cili edhe i ka prezantuar pikat e rendit të ditës.

Pikat e rendit të ditës të cilat u diskutuan ishin:

1. Procesverbali i mbledhjes së rregullt të KKSB-së të mbajtur me 14.04.2021; https://gllogoc.rks-gov.net/wp-content/uploads/2021/04/Scan_357.pdf

2. Njoftim për situatën epidemiologjike dhe vaksinimin në masë;

3. Njoftim lidhur me mbarimin e vitit shkollor 2020/2021;

4. Njoftim lidhur me çështjen e ndriçimit publik dhe mirëmbajtjen e tij;

Ndërsa, janë shtuar edhe tri pika tjera të cilat janë diskutuar nga anëtarët e KKSB-së:

4. Masat e ndërmarra për sigurimin e ujit të pijes gjatë sezonës verore;

5. Ndërmarrja e masave parandaluese për zjarrvëniet në natyrë;

6. Ndërmarrja e masave për sanimin e dëmeve te cilat po shkaktohen gjatë realizimit të projekteve nga operatorët.

Procesverbali i mbledhjes së fundit të mbajtur me datën 14.04.2021 është miratuar pa ndonjë vërejtje.

Për pikën e dytë, për njoftimin e situatës epidemiologjike në Komunën e Drenasit dhe procesin e vaksinimit ka informuar të pranishmit, drejtori i Shëndetësisë dhe Mirëqenies Sociale, Arsim Haxhiu. Haxhiu ka thënë se aktualisht është vetëm një rast aktiv me covid apo shprehur në përqindje 0,05%. Ndërsa sa i përket vaksinimit, ai ka thënë se janë gjithsej 4675 të vaksinuar dhe se procesi deri tani po shkon mirë.

Për pikën e tretë, drejtori i Arsimit, Muhamet Gjoka ka informuar anëtarët e KKSB-së për përmbylljen e vitit shkollor, të cilin pavarësisht pandemisë e ka vlerësuar të suksesshëm. Ai gjithashtu të pranishmit i ka informuar se Ministria e Arsimit gjatë ditës së djeshme ka njoftuar se dy profilet Infermieria dhe Mjekësia e Përgjithshme e Shkollës Profesionale “Fehmi Lladrovci” janë hequr nga planifikimi për regjistrim në vitin e ri shkollor 2021/2022, pa ndonjë sqarim apo njoftim paraprak, për të cilën menjëherë ka kërkuar sqarime apo arsyeje për këtë vendim.

Për pikën e katërt lidhur me ndriçimin publik, ka treguar për gjendjen drejtoresha e Shërbimeve Publike dhe Emergjencë, Lumnije Krapi. Ajo ka njoftuar të pranishmit me punën që është kryer deri tani për zgjerimin dhe shtrirjen e rrjetit të ndriçimit. Ndërsa, ka theksuar se disa fshatra me vetiniciativë kanë bërë shtrirjen e rrjetit të ndriçimit.

Drejtoresha Krapi ka njoftuar edhe për gjendjen e ujit të pijes dhe masat parandaluese e zjarrëvenieve dhe i është përgjigjur pyetjeve të adresuara nga anëtarët e KKSB-së. Kurse për dëmet eventuale që mund të shkaktojnë kompanitë gjatë realizimit të projekteve, ato janë të obliguara që të bëjnë sanimin, përkatësisht kthimin në gjendjen e mëparshme. Në pikën të ndryshme, janë diskutuar çështje të ndryshme që kanë të bëjnë me interesin e përgjithshëm dhe sigurinë e qytetarëve të Komunës së Drenasit.

Mbahet mbledhja e rregullt e Këshillit Komunal për Siguri në Bashkësi

Si mund të?

Si mund të?