Drejtoria e Shërbimeve Publike dhe Emergjencë ka filluar implementimin e projektit për largimin e deponive ilegale në Komunën e Drenasit. Realizimi i këtij projekti ka filluar në qendër të qytetit dhe lagjet përreth dhe do të vazhdojë edhe në disa fshatra të cilat paraprakisht kanë pranuar shërbimin e menaxhimit të mbeturinave. 
Komuna e Drenasit deri më tani ka futur në sistemin e menaxhimit të mbeturinave mbi 75% të territorit dhe është duke vazhduar aktivitetin, deri në fund të vitit të shtrijë shërbimin në të gjitha fshatrat. Mbetet problem disa pika ku qytetarët vazhdojnë të krijojnë deponi ilegale edhe pse ato pika pastrohen vazhdimisht nga DSHPE, si: te Shavarinat dhe Lagja e Xhamisë në Drenas.
Drejtoresha e DSHPE-së, znj. Hyrije Xhemajlaj-Thaqi, ka zhvilluar takime me përfaqësues të inspektoriatit dhe Stacionit Policor në Drenas nga ku janë koordinuar rreth implementimit për zbatimin e Udhëzimit Administrativ për gjoba mandatore me qëllim të ruajtjes së ambientit në ato zona ku tanimë është bërë largimi i deponive.
