Kryetari Lladrovci raporton para qytetarëve për punën e gjashtëmujorit të parë të këtij viti
Kryetari i komunës së Drenasit, Ramiz Lladrovci, ka mbajtur tubimin e parë me publikun, ku ka raportuar para qytetarëve për punën e gjashtëmujorit të parë të këtij viti dhe planifikimin e punëve për pjesën e dytë të vitit 2023.
Tubimi me publikun është mbajtur në Sallën e Kuvendit dhe kanë marr pjesë, kryetari i komunës, Ramiz Lladrovci, nënkryetari Arben Shala, drejtor të drejtorive komunale, administrator të vendbanimeve, përfaqësues të lagjeve dhe qytetarë.
Në këtë tubim me publikun, janë diskutuar aktivitetet e komunës të kryera për pjesën e parë të këtij viti dhe planifikimin për pjesën tjetër të mbetur të vitit. Takimin e ka hapur dhe udhëhequr, Udhëheqësi i Zyrës për Komunikim me Publikun, Bekim Dobra, i cili ka treguar për rëndësinë e këtij takimi me publikun dhe ka treguar se ky njoftim është bërë me kohë sipas kërkesave ligjore që përcaktohen.
Ndërsa, kryetari i Komunës, Ramiz Lladrovci, ka falënderuar të pranishmit për pjesëmarrje dhe bashkëpunimin e treguar në realizimin e projekteve, ndërsa të pranishmit, kanë shtruar pyetje dhe kanë dhënë rekomandimet e tyre për aktivitetet komunale që janë realizuar, që janë në proces të realizimit dhe atyre që janë të planifikuara të përfundojnë gjatë këtij viti.
Më poshtë, gjeni edhe fjalimin e plotë të kryetarit Lladrovci që ju është drejtuar të pranishmeve:
Të nderuar qytetarë të Drenasit,
Administratorë të vendbanimeve,
Zonja e zotërinj,
Ju faleminderit që keni gjetur kohën të jeni sot pjesëmarrës në këtë tubim ku do të flas shkurtas për punën e gjashtëmujorit të parë të këtij viti.
Komuna e Drenasit me të gjitha mundësitë që ka në dispozicion, është duke punuar që t’i realizoj projektet e planifikuara sipas buxhetit të miratuar në Kuvendin Komunal.
Falënderoj qytetarët, të cilët na kanë mirëkuptuar e bashkëpunuar në arritjen e qëllimeve tona të përbashkëta. Falënderoj në veçanti administratorët e vendbanimeve që pa kursyer kohën e tyre, kanë bashkëpunuar me ekzekutivin për realizimin e projekteve për të mirën e përgjithshme.
Komuna jonë për vitin 2021, rezultat që e kemi të konfirmuar sivjet, është komuna e parë në nivel vendi me performancën më të mirë dhe kemi fituar grantin mbi 2 milion e 34 mijë euro. Këto mjetet do të shfrytëzohen në realizimin e projekteve për të mirën e komunitetit.
Të nderuar të pranishëm,
Gjatë kësaj periudhe sa po raportojmë, janë në realizim dhjetëra projekte në infrastrukturë, arsim, shëndetësi e fushat tjera duke ngritur cilësinë e jetës për të gjithë qytetarët.
Po vazhdon asfaltimi i rrugëve, rregullimi i rrjetit të kanalizimit në shumicën e vendbanimeve dhe synim vetës i kemi dhënë që shumë shpejtë këtë problem të zgjidhim në secilin vendbanim, duke finalizuar edhe ndërtimin e kolektorëve për të trajtuar të gjitha ujërat e zeza.
Së shpejti, shpresoj se çështja e ndriçimit publik po finalizohet, duke u kryer në të gjitha lagjet e fshatrat e komunës tonë.
I kemi kryer detyrat tona lidhur me QKMF-në e re dhe presim fillimin e procedurave për ndërtimin e saj, po vazhdon Renovimi i QMF-ve e AMF-ve.
Projekti i BE-së për arsim, Projekti për avancimin e përshpejtuar të cilësisë në arsim, Renovimi i objekteve shkollore, rrethojat e fushave sportive, instalimi i energjisë eficiente, kabinetet e informatikës në të gjitha shkollat me laboratorë e mjete konkretizimi, janë disa nga aktivitetet për arsim në komunën tonë.
Po bëjmë renovimin e objekteve sportive, dhe po vazhdojmë me ndërtimin e Stadiumit “Rexhep Rexhepi” dhe palestrës “Hysni Jetullahu”, po ndertojmë fusha sportive në fshatra si dhe po bëjmë furnizimet e duhura ee përkrahjen e ekipeve tona sportive. Në mesin e këtyre rezultateve është hyrja e “F.C. Feronikli ‘74” në Supërligën e Kosovës.
Drejtoritë si ajo e Buxhetit dhe Financave, Ambientit dhe rregullimit hapësinor, Administratës dhe Inspektorati, janë në nivel të detyrës, duke përmbushur programin e vet të punës secila drejtori, me performancë të shkëlqyer.
Duhet lavdëruar mbledhjen e borxheve dhe vjeljen e taksave, ku përqindja e realizimit të planit është rreth 200% nga plani.
Drejtoria e zhvillimit ekonomik ka sukseset e lidhura me bizneset, regjistrimin e tyre si dhe angazhimin për Qendrën e biznesit “Drenasi 2”.
Shërbimet publike veprojnë 24 orë në shërbim të qytetarëve, nga kujdesi për deponitë, luftimin e deponive të egra, intervenimet emergjente, ndriçimi publik, rehabilitimi i rrugëve, mirëmbajtja e rrjetit të kanalizimeve është në nivelin e duhur, me investime të konsiderueshme.
Po vazhdojmë bashkëpunimin me organizatat që financojnë hapjen e puseve, përkrahjen e fermerëve përmes subvencionimit me pajisje të nevojshme për t’ua lehtësuar veprimtarinë. Sivjet është numri rekord i aplikimeve për subvencione, 1.163 aplikantë. Po ashtu, vëmendje i kemi kushtuar pyjeve, ku do të bëhet regjistrimi i tri objekteve pyjore dhe aktivitete tjera nga kjo lëmë.
Për ambientin jemi kujdesur duke mbjellë fidanë në qytet, jemi duke zbatuar Planin Zhvillimor Komunal dhe hartat zonale.
Në shëndetësi kemi rekrutuar personelin e lejuar me ligj, kemi shtuar furnizimet me material shpenzues e sanitar, jemi furnizuar me material për stomatologji dhe filma të rëntgenit.
Jemi kujdesur për rrethojat e QMF-ve dhe AMF-ve, ngrohjen, pjerrinat si dhe kemi blerë një autoambulancë si dhe kemi kontratë për servisim dhe mirëmbajtje të automjeteve.
Infrastruktura lokale përbën punët kapitale të angazhimit tonë, gjithandej po ndërtohen dhe janë në proces të ndërtimit.
Së shpejti fillon Rindërtimi i Sheshit “Fehmi Lladrovci”, Presim ta finalizojmë rrjetin e kolektorëve të ujërave të zeza, urat dhe tombinat në shumë lagje të komunës tonë.
Në Drenas po bëhet rikonstruktimi dhe zgjerimi i rrugëve, asfaltimi në dhjetëra lokalitete dhe shtruarja me zhavorr i shumë rrugicave gjithandej komunës tonë.
Është finalizuar parkingu për mbi 360 makina, kanale kulluese, shtrati i lumit, si dhe jemi në proces të ndërtimit të parkut dhe shtigjeve për këmbësor në pishat e Kamenicës.
Për ujin e pijes kemi intensifikuar kërkimin e llogarisë nga KRU Prishtina, që të aftësohen sa më shpejtë pajisjet e domosdoshme për ujin e pijes për 22 fshatra. Në të kundërtën, kemi paralajmëruar padi, për diskriminim të qytetarëve të 22 fshatrave.
Rrejti i kanalizimit po finalizohet duke përfshirë të gjitha lagjet e fshatrat e komunës, do të bëjmë kubëzimin dhe rehabilitimin e rrugëve.
Do ta rregullojmë tregun dhe për herë të parë do të përfshijmë edhe aftësimin e rrugëve fushore për fshatrat tona. Vëmendja jonë për fshatin do të jetë e vazhdueshme.
Ka filluar ndërtimi i rrugës Llapushnik-Berishë, Rruga për Çyçavicë dhe presim të finalizohet rruga qarkore Kroni i Mbretit – Drenas.
Investitorët si asnjë herë më parë janë të pranishëm në komunën tonë, të interesuar për fusha të ndryshme si energjia e ripërtëritshme, dy ofertues shumë serioz, një ofertues për Liqenin e Vërbocit, ofertues për prodhuesin më të madh në botë për mishin e pulës, e kompani të tjera.
Gjeodezia, prona e Kadastra, është e angazhuar maksimalisht për ta futur në sistem tërë tokën komasative, sepse pa këtë proces, qytetarët nuk mund të marrin fleta poseduese, që nga viti 1984/1987, sepse, nuk dihen kufijtë e saktë të pronave të qytetarëve. Kjo brengë na ka përcjell për 30 e 40 vjet.
Jemi të përkushtuar që ta aftësojmë Parkun e Biznesit, Drenasi 2 dhe jemi të lumtur se gjithçka do të ecë më shpejtë e më mirë se deri sot.
Të nderuar të pranishëm,
Duke marr edhe propozimet tuaja të dala nga dëgjimet buxhetore, ne kemi arritur t’i realizojmë thuajse të gjitha projektet e planifikuara, duke i shtuar ato dhe duke tejkaluar planin.
Ju ftoj që edhe në gjashtëmujorin e mbetur të këtij viti dhe viteve në vazhdim të bashkëpunojmë për të mirën e qytetarëve, duke e lehtësuar jetën e qytetarëve me projekte cilësore në shërbim të kualitetit të jetës tonë.
Ju faleminderit për vëmendjen!
