Më rastin e shënimit të 18 vjetorit të rënies së tre dëshmorëve të fshatit Abri të Komunës së Drenasit, Vesel Demaku, Valdet Xhemajli dhe Afrim Hajdari, të 29 martirëve të këtij fshati dhe dëshmorit Fatos Krasniqi nga Negroci, kryetari i Kuvendit të Republikës së Kosovës, z. Kadri Veseli, kryetari i Komunës së Drenasit, z. Nexhat Demaku, deputet të Kuvendit të Kosovës, organizata të dala nga lufta, familjar e qytetarë, kanë bërë homazhe pranë varrezave të tyre dhe kanë vendosur kurora lulesh. Gjatë përkujtimit të dëshmorëve dhe martirëve të masakrës Deliu, kryetari i Kuvendit të Kosovës, z. Kadri Veseli, shprehu respektin dhe dhimbjen për familjen Deliu, heronjtë, dëshmorët dhe martirët e masakrave të kryera nga ushtria e policia e regjimit serb, jo vetëm në Abri, por në tërë Kosovën, që me jetën e tyre dëshmuan përkushtimin për çlirim nga regjimi serb. "Kjo është historia jonë. Si e tillë, ajo është kujtesë e cila nuk duhet të harrohet. Ne nuk do ta harrojmë kurrë këtë sakrificë dhe gjak të derdhur, që nga foshnjat 3-muajsh deri te pleqtë 90-vjeçar. Nuk do të lejojmë asnjëherë që në këtë tokë të përsëriten gjëra të tilla. Kjo është një arsye më shumë pse duhet të jemi të bashkuar dhe ta forcojmë shtetin tonë", theksoi kryetari Veseli. Ndërsa kryetari i Komunës, z. Nexhat Demaku tha se dëshmia me e madhe për gjithë botën janë këto varre, se populli i Kosovës ka luftuar për liri të vendit. "Shënimi i këtij përvjetori është shembulli më i mirë për drejtësi dhe gjykime ndaj luftës së fundit, sot kujtojmë 3 dëshmor të UÇK-së të cilët nuk pranuan regjimin serb, por luftuan deri në frymën e fundit, por edhe martirizimi i 29 civileve, që nga fëmija 3 muajshe deri në plakun 90 vjet. Sot e 18 vite askush nuk është gjykuar për këtë krim makabër ndaj civilëve", ka thënë kryetari Demaku. Pas homazheve të varrezat, kryetari Veseli, kryetari Demaku dhe të tjerët kanë bërë vizita të familja Xhemajli, Deliu dhe Krasniqi.
