Kryetari i Komunës së Drenasit, z. Nexhat Demaku ka pritur në një takim drejtorin e Odës Ekonomike Amerikane, z. Arian Zeka ku kanë diskutuar për zhvillimin ekonomik në Komunën e Drenasit, në veçanti për Parkun e Biznesit dhe ecurisë së bizneseve në këtë zonë ekonomike. Kryetari Demaku ka njoftuar drejtorin Zeka për zhvillimet komunale dhe projektet infrastrukturore të cilat kanë përfunduar dhe që presin të përfundojnë, ndërsa po ashtu ka njoftuar edhe për projektet që këtë vit do të përfundojnë e që kryesisht janë projektet në infrastrukturën rrugore, të kanalizimit, ujësjellësit dhe riparimin e objekteve shkollore. Më theks të veçantë, kryetari Demaku ka njoftuar për Parkun e Biznesit në Drenas në të cilin janë të vendosura 40 biznese, ku 22 prej tyre janë në prodhim. "Parku i Biznesit në Drenas është një nga projektet më kapitale që Qeveria e Kosovës në bashkëpunim me Komunën kanë zhvilluar këto vitet e fundit. Në këtë zonë të biznesit janë vendosur 40 biznese dhe shumica prej tyre tani janë në prodhim dhe kanë gjeneruar me mbi 350 vende pune", ka thënë kryetari Demaku. Ndërsa drejtori i Odës Ekonomike Amerikane, z.Arian Zeka ka thënë se organizata që ai udhëheq është e gatshme t’i ofroj Komunës së Drenasit konsulta dhe përkrahje në fushën e biznesit për një zhvillim të qëndrueshëm ekonomik. "Ne takimin që zhvilluam me kryetarin e Demaku u dakorduam që Oda Ekonomike Amerikane është e gatshme të promovoj mundësit ekonomike dhe interesat e biznesit që ka Komuna e Drenasit për të tërhequr investitor në këtë pjesë të Kosovës si dhe të ofrojmë këshilla dhe përkrahje në zhvillimin ekonomik në Komunën e Drenasit", ka thënë Zeka.
