Kryetari i Komunës së Drenasit, z. Nexhat Demaku u takua me Kryetarin e Sindikatës në “Feronikel”, z. Fehmi Nika dhe përfaqësues tjerë të sindikatës, të cilët njoftuan kryetarin Demaku për shqetësimet dhe problemet e punëtorëve të cilët u larguan nga puna si dhe me propozimet e sindikatës të bëra menaxhmentit të “Feronikelit” vetëm që mos të largohet asnjë punëtor nga puna.
Kryetari Demaku shprehu shqetësimin për fatin e një numri kaq të madhë të punëtorëve të larguar nga “Feronikeli”. Ai thotë se menaxhmenti i “Feronikelit” është vënë në krye të një mase joligjore ndaj të drejtave të punëtorëve të garantuar me Ligjin mbi Punën, duke i larguar njëanshëm e pa paralajmërim diku rreth 85 punëtorë të këtij metalurgjiku. Ne mendojmë se menaxhmenti është treguar tejet i papërgjegjshëm me këtë akt, duke ua mohuar të drejtën e punës dhe të ekzistencës këtyre punëtorëve. Ne si Komunë jemi anashkaluar tërësisht me një vendim të tillë të menaxhmentit të kësaj kompanie, pohon kryetari Demaku.
Sindikata është e vendosur në kërkesën e saj për t’i kthyer në punë të gjithë punëtorët, ndërsa kryetari Demaku ka përfunduar se komuna do të jetë në mbrojtje të së drejtës së punëtorëve dhe do të angazhohet për mbrojtjen e ligjshmërisë në këtë çështje.
