Të premten pasdite, Ministri i Mjedisit dhe Planifikimit Hapsinor, Dardan Gashi, ka vizituar Komunën e Drenasit dhe së bashku me Kryetarin e Komunës, z. Nexhat Demaku vizituan ndërmarrjen e “Ferronikelit”, më ç’rast kanë njoftuar për plotësimin e kushteve për t’u paisur me leje të integruar mjedisore.
“Ne sot kemi arritur një marrëveshje me Ferronikelin, që më nuk do të këtë dënime pas vendimit të Gjykatës, tani ky problem do të zgjidhet përmes lejes së punës, që kompania do të paiset shumë shpejt, pas plotësimit të kritereve të parapara me ligj ambiental. Deri më tani kompania ka pasur vetëm pëlqim mjedisor dhe Ferronikeli do të jetë kompania e parë në rajon që do të paiset me leje të integruar mjedisore, që ne të kuptojmë plotësimin e kritereve për përmirësimin e ajrit, tokës dhe ujit”, ka thënë Ministri Gashi. Ai ka shtuar se pas arritjes së kësaj marrëveshje kompania do të mbikqyret nga Komisioni Evropian dhe Ministria. “Ka mbetur vetëm kohë mujore për t’i përmbushur këto kritere, dënimet nuk po sjellin përmirësime, tani edhe kompania e tretë e kontraktuar do të luaj rolin e vet monitorues dhe nga menaxhmenti jemi dakorduar që të plotësohen të gjitha kriteret e kërkuara mjedisore për t’u paisur me këtë leje të parë në rajon”, ka thënë Ministri Gashi. Ndërsa, Drejtori Menaxhues i Ndërmarrjes, Ioannis Gaitanos, ka thënë se kompania është duke e bërë më të mirën e mundshme për përmirësimin e ambientit. “Ne do t’i plotësojmë të gjitha kriteret e kërkuara nga ministria që ta marrim këtë leje dhe i jemi mirënjohës Ministrit Gashi që tani kompania është e para që do të merr edhe leje mjedisore”.
Kryetari i Komunës së Drenasit, Nexhat Demaku, ka thënë se me paisjen e lejes mjedisore, do të rregullohet çështja ambientale në Drenas që është për sa vite duke i shqetësuar qytetarët”.
