Kryetari i Komunës së Drenasit, Nexhat Demaku priti Ministren për Integrime Evropiane, Vlora Çitaku, ku u bisedua lidhur me Procesin e Ri-integrimit të personave të Riatdhesuar nga vendet e treta.
Të pranishëm në takim ishin: Dritëro Arifi, Këshilltar Politik në MIE dhe Shkumbin Noka, Këshilltar për Media dhe Relacione Publike në MIE, Xhemë Binaku, Drejtor për Administratë të Përgjithshme në Komunën e Drenasit, Afije Veseli, Shefe e Zyrës për Komunitete dhe Kthim dhe Ibrahim Hajdari, Zyrtarë për Integrime Evropiane.
Kryetari Demaku, falenderoi Ministren Çitaku për vizitën që i bëri komunës sonë njëkohësisht njoftoi me gjendjen e personave të Riatdhesuar në Komunën e Drenasit. Ai u shpreh “Gjatë vitit 2010 nga MPB zyrtarisht kemi pranuar listen për 141 persona të Riatdhesuar. Ndërsa deri në muajin prill të vitit 2011 nga MPB zyrtarisht kemi pranuar listen për 28 persona të Riatdhesuar. Zyra Komunale për Komunitete dhe Kthim ka vizituar shumicen dermuese të këtyre personave të Riatdhesuar, por vizita do të vazhdoj edhe tek personat e tjerë. Gjatë vizitës janë marrë shenime mbi gjendjen e tyre, kërkesat dhe nevojat e tyre. Në të njëjten kohë këta persona janë njoftuar me mundësit që mund t`iu ofroj Qeveria e Kosovës gjegjësishtë Ministria e Punëve të Brendshme dhe se ata mund të adresohen në Komunën tonë përkatësisht në Zyren Komunale për Komunitete dhe Kthim”-u shpreh Kryetari Demaku.
Ai gjithashtu njoftoi Ministren Çitaku se nga viti 2000 e deri në vitin 2011 në të gjitha shkollat e Komunës së Drenasit, vijojnë mësimin 341 nxënës të riatdhesuar të cilët deri më tani nuk kanë hasur në ndonjë problem si në regjistrim ashtu edhe në vijimin e mësimit në shkollat e Komunës së Drenasit.
Ministrja Çitaku gjatë fjalimit të saj cilësoi Komunën e Drenasit si njëra ndër komunat më të mira, që e ka kuptuar më së miri Procesin e Riintegrimit të personave të Riatdhesuar dhe që ka punuar shumë në këtë drejtim.
Ishte kjo vizita e parë zyrtare e Ministres për Integrime Evropiane, Vlora Çitaku që i bëri Komunës së Drenasit.
