Kryetari i Komunës së Drenasit, z. Nexhat Demaku priti në takim Ministrin e Ministrisë së Diasporës, z. Valon Murati. Gjatë këtij takimi u diskutua çështje të ndryshme, me theks të veçantë për rritjen e angazhimit dhe mobilizimit që do ta kenë institucionet qendrore dhe ato lokale për pritjen e bashkëatdhetarëve nga diaspora.
Kryetari Demaku duke falenderuar Ministrin Murati për vizitën e tij, u shpreh “ne kemi një numër bukur të madh të qytetarëve që jetojnë jashtë Kosovës, diku rreth 15 mijë veta dhe shifet ngarkesa gjatë sezonave, mirëpo ne gjithëherë mundohemi të krijojmë kushte më të mira për bashkëatdhetarët tanë, duke zgjatur orarin e punëtorëve të gjendjes civile dhe duke ua lehtësuar pajisjen me dokumente të nevojshme”.
Gjatë takimit u diskutua për përgatitjet e përbashkëta, për kërkesat që MD ka ndaj Komunave për pritjen sa më të mirë të diasporës, të angazhimit shtesë të personelit. Po ashtu, u diskutua edhe për aktivitetet kulturore që do të organizohen gjatë muajit të diasporës, në muajin korrik. Një prej çështjeve më të rëndësishme është edhe rritja e investimeve të diasporës me ç’rast u dakorduan që në organizimet të cilat do t’i bëjë MD, në disa prej tyre të shohim edhe mundësinë e angazhimit të Komunës së Drenasit me projekte konkrete por edhe të organizojnë vizita të biznesmenëve nga diaspora që do të vijnë në Kosovë. Gjithashtu u diskutua edhe rreth regjistrimit të diasporës që do të vazhdojë prapë gjatë muajve të verës por sidomos për aktivitetet e përbashkëta kulturore gjatë muajit të diasporës që do të fillojë nga data 2 korrik dhe do të zgjasë deri më datë 2 gusht.
Sipas Ministrit Murati, sa i përket fushës së investimeve nga diaspora komunat në përgjithësi janë një akter i rëndësishëm dhe se me një punë të përbashkët mes nivelit qendror edhe atij lokal do të duhej të krijohej një hapësirë dhe një ambient sa më i mirë për investime.
