Kryetari i Komunës, z. Nexhat Demaku, thirri një konferencë për media lidhur me një kontest pronësie midis Komunës dhe një familjeje nga Drenasi. Rreth kësaj çështjeje një e përditshme kosovare ka nxjerrë një shkrim, për mendimin e Komunës të njëanshëm, prandaj Kryetari ka dashurtë sqaroj opinionin rreth të vërtetës lidhur më këtë problem. Të pranishme ishin pothuajse të gjitha mediat elektronike kosovare si dhe ato të shkruara. Me poshtë po japim reagimin lidhur me shkrimin në fjalë të gazetës.
Ne jemi në mbrojtje të pronës së komunës
Gazeta “Kosova Sot” të shtunën, më 2 prill ka botuar një shkrim denoncues kundër tre zyrtarëve të Komunës së Drenasit me titull “I pari i Drenasit, para gjykatës!
Së pari, botimi i këtij shkrimi, i nxjerrë në rubrikën Kronika e zezë të kësaj gazete flet për qëllimin e caktuar të njëanshëm të redaksisë.
Së dyti, nxjerrja e këtij shkrimi dhe e vetë padisë private, kur nuk ka asnjë akt tjetër, flet për synimin e ushtrimit të presionit në opinion kinse për keqpërdorim të detyrës zyrtare. Kështu, shkrimi del sa i njëanshëm, po aq edhe joprofesional ka devijuar me qëllim dhe ka apostrofuar se bëhet fjalë edhe për korrupcion.
Së treti, ky rast nuk ka të bëjë me pronë private, sepse komuna ka prova për këtë si pronë komunale dhe e njëjta është tokë ndërtimore e jo bujqësore dhe si e tillë nuk ka mundur t’i jipet askujt si pronë private, siç është vendimi nr 04-462-111/92 i dt. 7 shkurt 1998, kurse plotfuqishmërinë e ka fituar më 6 mars 1998. Koha e theksuar është e njohur nga të gjithë shqiptarët e Kosovës, sepse më 28 shkurt në Likashan të Drenasit janë vrarë e masakruar 24 qytetarë të kësaj komune, ndërsa më 6 mars ka rënë Adem Jashari me familjarë dhe të tjerë, ndërkaq dikush nga shqiptarët ka gjetur këtë moment për të përfituar pronën e komunës.
Po theksojmë se kontestet që nga Gjykata Komunale dhe Agjencia Kadastrale e Kosovës kanë përfunduar në favor të Komunës, respektivisht të Drejtorisë së Kadastrit, Gjeodezisë e Pronës të Komunës së Drenasit.
Ne sqarojmë opinionin se pas një qëndrimi të tillë të redaksisë mund të fshihet dikush tjetër për korrupcion në dobi të pronës komunale, andaj ne jemi të hapur për tërë procesin se do të mbrojmë deri në fund pronën e komunës, ku është ndërtuar shkolla në të cilën vijojnë mësimet mbi 5oo nxënës.
Ne nuk jemi konsultuar fare nga redaksia në fjalë lidhur me shkrimin e djeshëm, që e konsiderojmë dobësi redaktoriale dhe autoriale të redaksisë në fjalë.
Reagimit tonë po ia bashkangjesim edhe vendimin (të skanuar) që dëshmon kohën kur është nxjerrë vendimi mbi përfitimin e paligjshëm të pronës së komunës.
Drenas, më 3 prill 2011
