Komuna e Drenasit i përgjigjet kërkesës së Thesarit për përpilimin e listave të grevistëve në Komunën tonë
Pas kërkesës së Thesarit të Shtetit drejtuar Komunës së Drenasit për përpilimin e listave të nëpunësve që janë në grevë, ne si Komunë kemi drejtuar tek personat përgjegjës kërkesën e pranuar.
Nga ta u informuam se përgjegjësit e programeve buxhetore nuk mund të përpilojnë lista siç është kërkuar për nëpunësit grevistë për arsye se të njëjtit janë në grevë dhe nuk kanë ofruar informata sipas kërkesës së Thesarit.
Poashtu në njoftimin nga zyrtarët përgjegjës jemi njoftuar se të gjitha shërbimet e natyrës që lidhen me afate janë kryer në Komunën e Drenasit, pra për disa kërkesa të tyre qytetarët kanë pranuar shërbime.
Kryetari Lladrovci mbështetë kërkesat e tyre legjitime për paga më të dinjitetshme të të gjithë zyrtarëve publik si dhe mirëpret unitetin e grevistëve në Komunën tonë.
Shpresojmë që sa më parë të bëhet zgjidhje për kërkesat e tyre legjitime dhe të kthehet normaliteti në punë.
Njëherit ju kërkojmë falje gjithë qytetarëve që këto ditë janë duke u ballafaquar me probleme në marrjen e shërbimeve të ndryshme, duke kërkuar mirëkuptimin e tyre për kërkesat legjitime të punëtorëve të sektorit publik.
