Drejtoria për Shërbime Publike dhe Emergjencë kërkon nga qytetarët e Komunës së Drenasit të cilët përdorin deponinë për hedhjen e mbeturinave inerte në fshatin Llapushnik që mbeturinat inerte t’i hedhin në pjesën e brendshme të deponisë (pasi ekziston hapësirë e mjaftueshme) e jo në hyrje të saj.
Qytetarë të pandërgjegjshëm kanë bllokuar pjesën hyrëse të deponisë duke pamundësuar qasjen në brendi të saj. Hedhja e mbeturinave në hyrje shkakton shumë pengesa pasi që bllokon qasjen në pjesën e brendshme të saj duke ua pamundësuar qytetarëve tjerë hedhjen e mbeturinave.
Drejtoria për Shërbime Publike dhe Emergjencë ju kujton të gjithë qytetarëve se kjo problematikë është duke u përsëritur tashmë disa herë, dhe DSHPE-ja vazhdimisht ka ndërhyrë për largimin e tyre deri në pjesën e brendshme të deponisë.
Andaj, me mirëkuptim ju kërkojmë që të veproni sipas kësaj kërkese, në të kundërtën nëse gjatë inspektimit ndokush nga qytetarët zihet në flagrancë duke shkarkuar mbeturina inerte në hyrje të deponisë, do të gjobitet sipas ligjeve në fuqi.
