Ish-sekretari i përgjithshëm i NATO-s, Lordi George Robrtson i shoqëruar nga zëvendëskryeministri Hashim Thaçi dhe kryetari i Komunës së Drenasit, Nexhat Demaku, u përkulën sot para pllakës përkujtimore te të rënëve në masakrën e Poklekut. Robertson edhe një herë pas 16 vitesh është kthyer në vendin ku paramilitarët serb dogjën fëmijë dhe pleq, për t’i nderuar viktimat e gjenocidit. Madje ai ne atë botë kishte deklaruar se "kush dyshon ne drejtësinë e intervenimit të NATO-s le të shkojë në Poklek". Ai gjatë qëndrimit të tij në Poklek tha se "jam pjesë e historisë së Kosovës dhe lirisë së sajë, këtu janë e ardhmja e vendit. Sërish mu kujtuan vuajtjet e familjarëve që kanë përjetuar dhe ajo kohë na kujton se sa e rëndësishme është të shikojmë nga e ardhmja. Gjithsesi që duhet t’i kujtojmë ata që dhanë jetën për liri dhe t’i kthejmë sytë nga e ardhmja e këtij shteti, që do të jetë së shpejti pjesë e Bashkimit Evropian dhe e familjes së madhe Evropiane", tha Robertson në Poklek. Ndërsa zëvendëskryeministri Hashim Thaçi tha se ndjehen krenar e të lumtur për vizitën e ish sekretarit të NATO-së të cilin e quajti liri të shpresës. "E falënderoj Robertson për këtë vizitë që po e benë në Poklek, ku të gjithë së bashku jemi këtu për të kujtuar viktimat e gjenocidit të Millosheviqit të kryera në Kosovë, dhe çdo here kur kujtojmë këto viktima marrim energji të reja për ndërtimin e shtetit tonë të ri. Falënderoj edhe një herë ish-sekretarin Robertson për kontributin personal në rolin mjaft aktiv në krye të NATO-s, prandaj shpreh mirënjohjen me të lartë ne emër të Kosovës, sepse ne jemi të nderuar për vizitën e tij sepse pa angazhimin e tij, Kosova do të ishte e vetmuar dhe në duar të kasapit Sllobodan Milloshoviq"ka deklaruar Thaçi. Edhe kryetari i Komunës së Drenasit, Nexhat Demaku ka falënderuar ish-sekretarin Robertson për vizitën që i ka bërë Poklekut. "Vizita e ish-sekretarit Robertson, na kthen në kohën kur Kosova përballej me regjimin e egër serb, por të njëjtën kohë ai na kujton kohën e shpresës. Ne i jemi mirënjohës zotit Robertson për punën dhe angazhimin e tij që Kosova të jetë e lirë dhe e pavarur. Përmes këtij njeriu, kuptoi diplomacia ndërkombëtare se intervenimi i NATO-s në Kosovë ishte veprim i patjetërsueshëm", ka thënë Demaku. Ish-sekretari i NATO-s Lordi George Robertson pranoi mirënjohje nga Komuna e Drenasit dhe fëmijët e shkollës "Fazli Grajqevci" i dhuruan atij një pikturë.
