Inaugurohet Kompleksi Memorial në Marinë të Skenderajt
Të premten është bërë inaugurimi i Kompleksit Memorial në Marinë të Skenderajt pas rivarrimit të 154 heronjve dhe dëshmorëve të ZO të Drenicës dhe është bërë rivarrimi i fundit i heronjve të kombit; Ilaz Kodra, Mujë Krasniqi dhe Abedin Rexha.
Në këtë ceremoni inauguruese të këtij Kompleksi, merrnin pjesë, Presidenti i Republikës së Kosovës, Hashim Thaçi, Kryeministri, Ramush Haradinaj, Kryetari i Kuvendit, Kadri Veseli, Kryetari i Komunës së Skenderajt Bekim Jashari, Kryetari i Komunës së Drenasit, Ramiz Lladrovci, ministra, deputet, shoqata të dala nga lufta e UÇK-së, familjarë, qytetarë e shumë personalitete nga vendi.
Para të pranishmëve i është drejtuar me një fjalë rasti, kryetari i Komunës së Drenasit, Ramiz Lladrovci i cili ka se sot po bashkohen heronjtë dhe dëshmorët ne zemër të Drenicës. “Faleminderit për kontributin e gjithë secilit që i ka kontribuar kësaj iniciative, nga sot heronjtë dhe dëshmorët janë të bashkuar ashtu siç ishin të bashkuar në rrugën e lirisë, në krye me komandantin legjendar Adehm Jashari, faleminderit Bekim, Hashim, Kadri e Ramush”, ka thënë nder të tjera kryetari Lladrovci. Kryetari Lladrovci ka shtuar se ne këtë ditë po përmbyllet një vepër e njomur me lot, dhimbje dhe kujtime sublime dhe po bashkohen heronjtë dhe dëshmorët tanë. “Kjo u bë sepse të gjitha institucionet ishin njëzëri që këto varreza të dëshmorëve, meritonin të kenë respektin e plotë të shtetit të Kosovës për të cilin ata e dhanë edhe jetën. Shpreh falënderim për secilën familje të heroit dhe dëshmorit të kombit që ndihmuan për ditë që të përmbyllet një detyrë plot dhimbje e krenari. Sot, jemi duke qëndruar gatitu! Jo vetëm sa jemi këtu, sot është gatitu Kosova për nderim të heronjve dhe dëshmorëve të rivarrosur në Marinë! Për këtë, familje të nderuara të dëshmorëve, duhet të jeni krenare! Sepse të gjithë ne jemi krenar me juve. Po qëndrojmë gatitu për Ilaz Kodrën, për Abedin Rexhën, për Mujë Krasniqin, për të gjithë 157 dëshmorët e kombit. Që i dhanë rrugë, i dhanë drejtim, lirisë tonë, pavarësisë tonë. Sot, këtu nga Marina, po e japim sërish zotimin nga një vend i shenjtë ku prehen heronjtë tanë, se ne, po punojmë dhe do të punojmë deri në frymën e fundit, me idealin Tuaj, në shërbim të atdheut tonë, në shërbim të kombit tonë, në shërbim të qytetarëve tonë! Dje, ishte zotim për arritjen e lirisë me çdo çmim, deri në çlirim. I përjetshëm është kujtimi për të gjithë heronjtë dëshmorët dhe martirët e kombit! Lavdi e përjetshme për heronjtë dhe dëshmorët e kombit”, ka thënë kryetari Lladrovci.
Presidenti i Republikës së Kosovës, Hashim Thaçi tha se në Marinë të Skenderajt, nga sot do të pushojnë eshtrat e 158 heronjve të Ushtrisë Çlirimtare të Kosovës. “Te ky memorial, ku do të prehen edhe tre komandantët e shquar të luftës sonë çlirimtare, Abedin Rexha, Mujë Krasniqi dhe Ilaz Kodra, do të përkulen përjetë brezat e tashëm dhe të ardhshëm, që do ta vizitojnë për të kuptuar sa e shtrenjtë ishte liria dhe pavarësia e shtetit tonë. Shumë më të shtrenjtë se jetën, dëshmorët dhe heronjtë e kishin gjithmonë lirinë e atdheut”, ka thënë Presidenti Thaçi.
Kryetari i Kuvendit të Kosovës, Kadri Veseli tha se Komandantët që sot po rivarrosën në lëndinën e krenarisë kombëtare ne Marinë, Ilaz Kodra, Mujë Krasniqi dhe Abedin Rexha, ishin udhëheqësit e parë te betejave të para të UÇK-së të cilët ranë për t’u ngritur Kosova. “Amaneti i tyre vazhdon të na frymëzojë në rrugën e fuqizimit të shtetit të pavarur e sovran të Kosovës. Ta ruajmë të pastër e të pacenuar kujtimin e këtyre heronjve. Sepse, kështu e ruajmë lirinë tonë”, ka thënë kryeparlamentari Krasniqi.
Kryeministri i Republikës së Kosovës, Ramush Haradinaj tha se sot është një ndjenjë e posaçme që sot po e përmbyllin një borxh, një varr të dinjitetshëm për ata që luftuan dhe ranë në fushë të nderit për ta mundur vet luftën. “Kemi arsye të krenohemi, sepse në Kompleksin Memorial në Marinë të Skenderajt, kanë zënë vend eshtrat e bijve tonë, luftëtarëve të këtij populli. Gjaku i tyre është shkrirë në flamurin e lirisë, zëri i tyre do të dëgjohet në betimin dhe shikimin përpara në rrugëtimin tonë euro-atlantik. U jemi borxhli atyre, që ta forcojmë dhe ta përsosim shtetin tonë, atë për të cilin luftuan dhe ranë, dhe mbi të gjitha, që ta ruajmë lirinë dhe kufijtë e Kosovës, që ata të mos i prek kurrë më, askush. Prehuni të qetë në tokën të cilës ia falët jetën! Nderim i veçantë edhe për bashkëluftëtarin dhe komandantin e këtyre heronjve, Gjeneral Sylejman Selimin, i cili sot nuk kishte mundësi të jetë në mesin tonë”, ka thënë kryeministri Haradinaj.
Kryetari i Komunës së Skenderajt, Bekim Jashari tha se nga sot ky vend bëhet pjesë e kujtesës tonë kolektive, si fitohet liria, është rikujtesë se si fitohet përjetësia. “Sot, Marina po e bart peshën e dhimbjes dhe të krenarisë tonë, për heronjtë tanë që përjetësisht. Nga këtu do t’i bëjnë roje atdheut tonë, lirisë tonë, ndërgjegjes tonë. Për mua si Kryetar Komune dhe pjesëtar i Familjes Jashari ishte detyrë e imja e parë që të përkujdesëm për ata që dhanë më së shumti për këtë tokë, për lirinë tonë, andaj me të marrë detyrën e kryetarit të komunës filluam me procesin e rivarrimit të dëshmorëve nga Polaci në Kompleksin Memorial në Marinë. Unë nuk mund të lejoja që në shënimin e përvjetorëve të dëshmorëve , të ditës së flamurit, ditës së Pavarësisë dhe Epopesë së UÇK-së të vendosnim lule pranë varreve të dëshmorëve, ku nuk mund të dalloheshin emrat e tyre të shënuar në dërrasa druri. Mua nuk më lejonte ndërgjegjja ime që të qëndroja në karrige në zyrën time, ndërsa varret e dëshmoreve të mos dihen se ku janë, pa trajtimin e duhur institucional”, ka thënë nder të tjera kryetari Jashari.
Pas rivarrosjes së tre dëshmorëve, Ilaz Kodra, Mujë Krasniqi dhe Abedin Rexha nga FSK-ja, personalitetet shtetërore kanë venë kurora me lule të shtatorja e dëshmorëve të lirisë në Marinë dhe tek varrezat e dëshmorëve.
