Kryetari i Komunës së Drenasit, Ramiz Lladrovci, sot bëri hapjen zyrtare të shqyrtimit publik të Projekt- Planit Zhvillimor Komunal të Gllogocit 2020-2028.
Qëllimi i këtij prezantimi ishte që të zhvillohen konsultime dhe që të inkurajohet pjesëmarrja transparente e publikut në hartimin e këtij dokumenti strategjik multisektorial.
Kryetari i Komunës i njoftoi të pranishmit se bazuar në obligimet ligjore që përcaktohen në Ligjin Nr.04 /L-174 për Planifikimin Hapësinor, Komuna e Gllogocit ka filluar me procesin e hartimit të Planit Zhvillimor të Komunës dhe se ky proces deri në finalizim të PZHK-së, ka kaluar nëpër këto faza kryesore siç janë: Profili i gjendjes ekzistuese; Vlerësimi i gjendjes ekzistuese; Koncepti i zhvillimit hapësinor; Prioritetet strategjike; Plani i veprimit.
Të gjitha fazat në procesin e hartimit të PZHK-së janë përcjellë me pjesëmarrje aktive të qytetarëve, dhe me mbajtjen e punëtorive që kanë shërbyer si mjet për të diskutuar përmbajtjet e çdo kapitulli të PZHK-së.
Gjatë periudhës së shqyrtimit publik qytetarët e Komunës së Drenasit do të kenë mundësi që të japin vërejtjet, komentet dhe sugjerimet, të cilat pastaj do të inkorporohen në dokumentin e Planit Zhvillimor Komunal për periudhën kohore 2020-2028.
Kryetari Lladrovci ka falënderuar kontribuuesit e hartimit te Planit Zhvillimor Komunal siç janë: Ekipi Komunal i Planifikimit, Ekipi Këshillues i Komunitetit, GIZ-in gjerman, Kompaninë hartuese Plan A Consulting, Ministrinë e Mjedisit dhe Planifikimit Hapësinor dhe Institutin për Planifikim Hapësinor.
Shqyrtimi publik do të zgjatë 30 ditë që nga dita e hapjes. Vërejtjet, komentet dhe sugjerimet mund të bëhen në librin e vërejtjeve apo përmes adresës elektronike: pzhkdrenas@gmail.com
Vegëzen elektronike për qasje në versionin digjital të dokumentit të PZhK-së mund ta gjeni në : https://gllogoc.rks-gov.net/wp-content/uploads/2020/02/Draft-PZHK-Gllogoc_05.02.2020-1.pdf
