Drejtori i përgjithshëm i Kompanisë NewCo Ferronikeli z. Konstantinos Rizopoulos dhe Drejtori i Arsimit nga Komuna e Drenasit z. Sadik Tahiri, nënshkruan vazhdimin e marrëveshjes së bashkëpunimit për realizimin e praktikës profesionale për nxënësit e shkollës së mesme profesionale “Fehmi Lladrovci” në Drenas. Drejtori i Arsimit në Komunën e Drenasit, z. Sadik Tahiri, këtë marrëveshje e vlerësoi si shumë të qëlluar dhe të dobishme pasi siç u shpreh ai nxënësit janë tejet të kënaqur me realizimin e pjesës praktike në NewCo Ferronikel. “Ripërtëritja e kësaj marrëveshjeje është një e arritur shumë e madhe për Drejtorinë e Arsimit në Komunën e Drenasit dhe veçanërisht për nxënësit e Shkollës Fehmi LLadrovci, ngase kjo do të rezultojë padyshim në një sukses shumë më të mirë për ta. Nxënësit kanë kërkuar që të vazhdohet kjo marrëveshje meqenëse ka qenë shumë e dobishme për ta. Andaj falënderoj menaxhmentin e NewCo Ferronikelit dhe të gjithë të tjerët që kanë kontribuar drejt realizimit të kësaj marrëveshje”, u shpreh z. Tahiri. Ndërkaq drejtori gjeneral i NewCo Ferronikelit, z. Konstantinos Rizopoulos tha se kjo marrëveshje është si rrjedhojë e bashkëpunimit të mirë që kemi ndërtuar me Komunën e Drenasit. Më konkretisht z. Rizopoulos tha se “me vazhdimin e kësaj marrëveshje nxënës të tjerë të kësaj shkolle profesionale do të kenë mundësi të mësojnë edhe anën praktike dhe kështu do të jenë më të gatshëm për vazhdimin e studimeve të mëtutjeshme dhe gjithashtu do të aftësohen për hyrje në treg të punës. ”Sipas z. Rizopoulos marrëveshje të tilla nuk do të mungojnë edhe në të ardhmen jo vetëm në sektorin e arsimit por në përgjithësi për të mirën e komunitetit të Drenasit.
