Drenasi e Skenderaj me homazhe nderojnë “Epopenë e UÇK-së” dhe familjen Jashari
Më rastin e shënimit të 22 vjetorit të “Epopesë së UÇK-së”, rënies heroike të Familjes Jashari dhe Komandantit Legjendar, Adem Jashari, kryetari i Komunës së Drenasit, Ramiz Lladrovci së bashku me kryetarin e Skenderajt, Bekim Jashari, zyrtarët komunal të dy komunave, asambleist, drejtorë, deputet, gjeneral e veteran të UÇK-së, kanë bërë homazhe në Kompleksin Memorial “Adem Jashari” në Prekaz, në kujtim të kontributit të familjes Jashari dhe kanë venë buqeta të freskëta me lule pranë varrezave të të rënëve.
Për t’i nderuar të rënët me rastin e 22 vjetorit të “Epopesë së Ushtrisë Çlirimtare të Kosovës”, homazhet kanë vazhduar edhe në Kompleksin Memorial të Dëshmorëve ne Marinë dhe në Sheshin “Fehmi Lladrovci” në Drenas pranë shtatorëve të Shaban, Hamëz e Adem Jashari.
Me këtë rast, kryetari Lladrovci ngriti lartë kontributin e Familjes Jashari si dhe të gjithë luftëtarëve dhe dëshmorëve të UÇK-së. “Ne si dy komuna po mundohemi ta jetësojmë amanetin e heronjve, Komandantit Legjendar Adem Jashari dhe të familjes së tij si dhe të gjithë luftëtarëve e dëshmorëve të tjerë”, ka thënë mes tjerash kryetari Lladrovci.
Edhe kryetari i Komunës së Skenderajt, Bekim Jashari u shpreh krenar për kontributin e familjes së tij, por edhe u zotua se do të ecin përpara në rrugën që ata e dëshiruan. “Ndihemi krenar me veprat e tyre dhe marrim forcë e kurajo që së bashku të ecim përpara në rrugën e drejtë dhe të pastër në vendin tonë, ashtu siç dëshiruan ata”, ka thënë kryetari Jashari.
