Dr Zejnullah Gruda dhe Abedin Selimaj nga Instituti për Hulumtimin e rimeve të Luftës qëndruan sot në komunën e Drenasit. Ata i priti nënkryetari Sherif Krasniqi. Temë bisedimi ishte bashkëpunimi i ndërsjellë për të mbledhur të dhënat për krimet serbe gjatë luftës në territorin e kësaj komune. Ky Institut u themelua vitin e kaluar me vendimin e Qeverisë së Republikës së Kosovës dhe ne jemi të interesuar që të tubohen të dhënat për këto krime të kohs së luftës, duke pretenduar që ende memorja tek dëshmitarët është në nivel. Mirëpo, ajo mund të zbehet dhe dëshmitarët po ikën nga jeta, kështu që na duhet sa më shpejt të kemi një sistem të dhënash për këto zhvillime. Në kuadër të këtyre detyrave, ne do të donim që të kemi të dhënat për të vrarët, të plagosurit, të pagjeturit, si dhe krimet tjera që kanë ngjarë në këtë trevë. Ne mund të krijojmë një bankë të dhënash për këto dhe pastaj të nxirren botime të tyre, duke shikuar që në të ardhmen të trokasim edhe në dyert e Gjykatës Ndërkombëtare për Krime të Luftës për të prezantuar tërë krimet mbi këtë popullatë e trevë –tha kryetari i IHKL, dr Zejnullah Gruda. Ndërkaq, nënkryetari i komunës së Drenasit, Sherif Krasniqi u shpreh i gatshëm për të ndihmuar punën e këtij institucioni të Ministrisë së Drejtësisë si obligim për të gjallëruar zhvillimet e barbarisë serbe mbi këtë zonë.
