Zyrtarisht të enjten janë shpërndarë 400 kontinjeret familjar në fshatin Nekoc, ku të pranishëm në këtë ceremoni të shpërndarjes ishin Kryetari i Komunës, z. Nexhat Demaku dhe drejtori i organizatës gjermane GIZ, z. Kai Hofmman.
Më këtë rast kryetari Demaku falënderoi organizatën gjermane GIZ për bashkëpunimin që kanë për disa vite në projektin e Zgjerimit të Shërbimit për Menaxhim të Mbeturinave. "Ka qenë kërkesë e banorëve të fshatit Nekoc që të përfshihen në menaxhim të mbeturinave dhe falënderoi GIZ-in për kontributin e çmueshëm që po e jep në këtë projekt i cili po vazhdon sot dhe besoj që do të vazhdoj edhe ditëve në vazhdim deri në përfshirjen e gjithë territorit të Komunës në mënyrë që të krijojmë një ambient sa më të pastër", ka thënë kryetari Demaku. Ndërsa drejtori i GIZ për Kosovë, Kai Hofmman ka thënë se ndihet shumë i lumtur që partneriteti me Komunën e Drenasit po vazhdon të jep rezultatet për një ambient të pastër. "Drenasi para disa ditësh u shpall edhe si Komuna më e suksesshme për arritjen e efiçiencës dhe pa dyshim që do të jetë Komuna e parë që do ti prinë edhe në ambient sa më të pastër. Ne do të vazhdojmë të përkrahim këtë projekt deri sa të përfshihet i gjithë territori në shërbim të menaxhimit të mbeturinave", ka thënë Hofmman. Ndërsa në emër të fshatit ka folur Fatmir Dugolli i cili ka falënderuar Komunën dhe GIZ-in që kanë marrë realizuar kërkesat e fshatit që të shtrihet ky projekt në vendbanimin e tyre. Kryetari i Komunës në shënjë falënderimi ka dhënë një mirënjohje drejtorit të organizatës gjermane GIZ. Pas pjesës ceremoniale, janë lidhur kontratat me kompaninë e "Pastrimit" dhe ekonomive familjare. Në këtë projekt kanë përfituar 400 ekonomi familjare, ndërsa fushatën vetëdijesuese dhe organizimin e ka kryer organizata CEDE. Në kuadër të këtij projekti është përfitues edhe fshati Damanek, ndërsa kujtojmë se vitet e kaluara kanë hyrë në shërbim të zgjerimit edhe Komorani, Tërsteniku, Vërboci e Kishnareka. Gjatë këtij viti ky projekt do të shtrihet edhe në fshatra tjera, kurse mbulueshmeria në shërbim të mbeturinave deri më tani janë 56 për qind nga i gjithë territori i Komunës.
