Komuna e Drenasit organizoi tubim publik për të diskutuar dhe prezantuar të arriturat dhe aktivitetet e gjashtëmujorit të parë të këtij viti. Takimi u mbajt në sallën e kuvendit të komunës, ku morën pjesë qytetarë të shumtë, përfaqësues të institucioneve lokale, si dhe përfaqësues të fshatrave.
Takimin e hapi Udhëheqësi i Zyrës për Komunikim me Publikun, Bekim Dobra, i cili mbajti fjalën hyrëse dhe falënderoi të gjithë të pranishmit për pjesëmarrjen e tyre. Ai theksoi rëndësinë e këtij tubimi si një platformë për të dëgjuar dhe diskutuar me qytetarët për progresin dhe sfidat e përbashkëta.
Kryetari i Komunës, Ramiz Lladrovci prezantoi një raport të detajuar mbi të arriturat dhe projektet e realizuara gjatë gjashtëmujorit të parë. Ai përmendi disa projekte kyçe, përfshirë përmirësimet në infrastrukturë, përparimet në arsim dhe shëndetësi, si dhe iniciativat për mbështetjen e bizneseve lokale. Po ashtu ka përmendur edhe sfidat me të cilat është ballafaquar Komuna gjatë vitit të kaluar dhe fillim të këtij viti, ku përmes formave përmbarimore janë marr nga buxheti i komunës mbi 1 milion euro për zbatimin e kontratës kolektive, ku ka prishur edhe projektet e planifikuara gjatë këtij viti.
Pas prezantimit të kryetarit, takimi u hap për diskutim dhe pyetje nga të pranishmit. Qytetarët shprehën interes për projekte të ndryshme dhe paraqitën sugjerimet dhe shqetësimet e tyre. Pyetjet e tyre u përgjigjën nga përfaqësuesit komunal të pranishëm, duke krijuar një dialog të hapur dhe konstruktiv.
Ky tubim u vlerësua si një hap i rëndësishëm për të forcuar lidhjen dhe komunikimin ndërmjet përfaqësueseve komunal dhe qytetarëve, duke kontribuar kështu në rritjen e transparencës dhe llogaridhënies së institucioneve komunale.
