Në Sallën e Kuvendit Komunal në Drenas, është mbajtur takimi fillestar i Grupit Punues për hartimin e dokumentit të Vlerësimit të Rrezikut dhe Planit për Reagim Emergjent Lokal për territorin e Komunës së Drenasit.
Ky takim shënoi fillimin zyrtar të një procesi me rëndësi strategjike për sigurinë publike dhe menaxhimin e situatave emergjente në komunën tonë. Të pranishëm ishin anëtarët e Grupit Punues, përfaqësues nga Agjencia për Menaxhim Emergjent (AME), si dhe ekspertë të fushës dhe përfaqësues komunalë.
Takimi u hap me fjalën përshëndetëse të Nexhmedin Gruda, Koordinator i Grupit Punues, i cili theksoi rëndësinë e angazhimit të të gjithë akterëve relevantë në këtë proces. Në vijim, Afrim Prokshi, Zëvendës Koordinator, elaboroi mbi ndikimin e dokumentit në forcimin e kapaciteteve për reagim ndaj situatave të rrezikut.
Pjesa kryesore e takimit u mbajt nga Nijazi Miftari, udhëheqës i Divizionit për Vlerësimin e Rrezikut dhe Kryesues i Grupit Punues në kuadër të AME-së. Ai prezantoi planin e punës, metodologjinë që do të përdoret dhe theksoi rëndësinë e përfshirjes së komunitetit lokal në këtë proces.
Takimi u përmbyll me diskutime interaktive dhe pyetje nga pjesëmarrësit, të cilët shprehën përkushtimin për të kontribuar në mënyrë aktive në këtë proces gjithëpërfshirës.
Ky aktivitet përbën hapin e parë drejt planeve për parandalimin dhe menaxhimin efektiv të rreziqeve në territorin e Komunës së Drenasit.
