Është mbajtur akademia falenderuese për veprimtarët e çështjes kombëtare Jahir Prenku e Isë Elshani.
Sot në Sallën e Kuvendit Komunal të Drenasit, në prani të bashkëveprimtarëve të Lëvizjes Popullore të Kosovës dhe qytetarëve të Drenasit dhe më gjerë, u dekoruan me mirënjohje nga Komuna e Drenasit veprimarët e shquar të çështjes kombëtare, Jahir Prenku dhe Isë Elshani.
Në një fjalë rasti kryetari Lladrovci falenderojë për kontributin e dhënë në një kohë të vështirë për vendin tonë, duke përshkruar ngjarjet e mëdha ku u dallua përkushtimi i tyre për çështjen kombëtare.
“Veprimtaria e tyre filloi nga vitit 1968, nga demonstrata e parë e madhe, për të vijuar më 1969, e vijon me kontribut brenda organizimit të rezistencës, nga viti 1977 e tutje. Fillimisht u angazhuan te “Fronti i Kuq Popullor”, ndërsa me themelimin e LPK-së, më 1982, të dytë ishin aktivist të shquar dhe kontribuues të lëvizjes deri në çlirim.
Isa dhe Jahiri, kanë qenë bashkëveprimtarë të Ibrahim Kelmendit, dhe heronjve Jusuf Gërvallës e Kadri Zekës, veprimtarëve të dëshmuar për çlirimin e atdheut dhe veprimtarë që angazhuan shumë bashkatdhetarë në rrugën patriotike.
Isa ishte në udhëheqje të LRSShJ për Gjermani, ndërsa Jahiri aktivist, që kryente aksione te ndryshme, qofte propagandistike duke shpërndarë gazeta, libra dhe material propagandues brenda mërgatës, qoftë me pjesëmarrje në demonstrata antijugosllave gjithandej Evropës dhe shtimin e radhëve të LPK-së.
Isa në Bon dhe Jahiri në Këln, organizuan këshillat popullor të LPK, nga viti 1982.
Po ashtu, për të qenë më afër bashkatdhetarëve, ata ishin anëtarë dhe veprimtarë të dalluar në Klubin “Emin Duraku” në Dyseldorf.
Isa u zgjodh në vitin 1987, në Mbledhjen e Përgjithshme të LPK-së, anëtar i Këshillit të Përgjithshëm. Këtë detyrë e mbajti deri në vitin 1998, kur u largua nga Këshilli i Përgjithshëm.
Do potencuar se Greva e organizuar nga LPK në emrin e Bashkimit Demokratik të Shqiptarëve në Gjermani, mori lejen për këtë grevë Isë Elshani (i shoqëruar nga Time Dukaj)“, ku morën pjesë Fehmi Lladrovci, Ilaz Kodra, Ibrahim Kelmendi, Bardhyl Mahmuti, Sabri Kiçmari, Afrim Hoti, Isuf Ibërdemaj, Tafë Tafaj, etj.
Greva kishte filluar më 13 maj 1996 dhe ka zgjatur dy javë, duke marrë jehonë për aktivizim të Qeverisë së përkohshme të Kosovës, faktorit ndërkombëtar dhe mërgimtarëve për të qenë më aktiv për lirinë e Kosovës”, ishte kjo pjesë nga fjalimi i kryetarit Lladrovci në përshkrimin e ngjarjeve ku protagonistë ishin edhe dy veprimtarët për të cilët u mbajtë akademia falenderuese.
Në këtë akademi morën pjesë me fjalë rasti edhe bashkëveprimtarët : Emrush Xhemajli, Xhevat Bislimi, Izet Ibrahimi etj.
