Drenasi vlerësohet për përfaqësimin gjinor në nivel lokal nga MAPL-ja
Kryetari i Komunës së Drenasit, Ramiz Lladrovci të mërkurën ka pranuar certifikatën nga Ministrja e Ministrisë së Administrimit dhe Pushtetit Lokal, Adrijana Hodzic për arritjen e përfaqësimit gjinor në nivel lokal dhe mundësinë e pjesëmarrjes së grave në vendimmarrje, “Në vlerësim të përpjekjeve të bëra dhe për kontributin drejtë barazisë gjinore në Komunën e Gllogocit”.
Në këtë tryezë, merrnin pjesë, Shefi i Misionit të OSBE-së në Kosovë, Shkëlqesia e Tij, Ambasadori Jan Braathu, Ministrja e MAPL-së, Ardijana Hodzic, Kryetari i Komunës së Drenasit, Ramiz Lladrovci, Shefe e Agjencisë për Barazi Gjinore në Kosovë, Edi Gusia dhe përfaqësues të shoqatave të grave në Kosovë.
Ky vlerësim nga MAPL-ja, Komunës së Drenasit i është bërë në kuadër të “Përfaqësimit gjinor në nivel lokal – 2 vite pas zgjedhjeve lokale”, dhe Kryetari i Komunës, Ramiz Lladrovci është vlerësuar me perfomancën më të mirë bazuar në indikatorët e performancës gjinore.
Kryetari Lladrovci para të pranishmëve, ka falënderuar MAPL-në dhe OSBE-në për këtë vlerësim dhe ka inkurajuar të gjitha gratë që të mbështesin njëra tjetrën në fuqizimin e udhëheqjes në vendimmarrje.
