Me rastin e shënimit të 26 vjetorit të Epopesë së Ushtrisë Çlirimtare të Kosovës, në Prekazin e Komandantit legjendar Adem Jasharit dhe familjes Jashari, kryetari i Komunës së Drenasit, Ramiz Lladrovci së bashku me kryetarin e PDK-së, Memli Krasniqi, atë të Skenderajt, Fadil Nura, zyrtarë komunal të dy komunave, asamblistë, drejtorë, deputet, familjarë të dëshmorëve, veteranë të UÇK-së, si dhe qytetarë të shumtë, bënë homazhe në Kompleksin Memorial “Adem Jashari” në Prekaz, në nderim të sakrificës së familjes Jashari ku edhe vendosën buqeta me lule.
Me këtë rast, kryetari Lladrovci, përkujtoi dhe ngriti lartë kontributin e komandantit legjendar, Adem Jashari dhe familjes Jashari, duke thënë se:
“Komandanti legjendar, Adem Jashari dhe familja Jashari, dëshmoi si asnjëherë më parë, sa i fortë e i madh ishte vullneti ynë për liri. Ishte vullnet që asnjë forcë më nuk mund ta ndalte, deri në çlirimin e Kosovës.”
Pas homazheve, kryetari Lladrovci së bashku me bashkëveprimtarë e bashkëluftëtarë, mori pjesë në zbulimin e bustit të heroit e heroinës, Hamit e Sala Jasharit, familje emblematike dhe qëndrestare, të cilët dhanë kontribut të madh për çlirim dhe u flijuan për lirinë e Kosovës.
“Çdo Mars me pranverën do të na sjell emocionet dhe ndjenjat më fisnike të përkushtimit të përbashkët, njëherësh kujtime krenare, sepse, në hapat e parë të rrugës për çlirim, pata fatin të ecim së bashku.
Sot, me ne në shënimin e Epopesë, nuk janë heronjtë e luftës dhe paqes, Hashim Thaçi, Kadri Veseli, Jakup Krasniqi, Rexhep Selimi dhe çlirimtarët tjerë, por, presim që drejtësia ta thotë fjalën e vet dhe ata të kthehen si gjithmonë fitimtar.
Duke ecur vitet, shkëlqimi i Epopesë së UÇK-së po rritet, nderimi dhe përkushtimi për heronjtë, dëshmorët dhe martirët e kombit, po bëhet më i madh.”, theksoi tutje kryetari Lladrovci.
Lavdi heronjve, dëshmorëve dhe martirëve të lirisë!
Lavdi Komandantit legjendar Adem Jasharit dhe Jasharajve legjendarë!
Lavdi e përjetshme Ushtrisë Çlirimtare të Kosovës!
̈ ̈ ̈ ̈ ̈ ̈ ̧ ̈ ̈ , ̈ .
Mbledhja u kryesua nga kryesuesi i Kuvendit Komunal, Milaim Hajdari, ndërsa merrnin pjesë, kryetari i Komunës, Ramiz Lladrovci, nënkryetari Arben Shala, drejtorë të drejtorive komunale, anëtarë të kuvendit dhe qytetarë të shumtë.
Në hapjen e kësaj mbledhje solemne, kryesuesi i Kuvendit, Milaim Hajdari, pati një fjalë rasti, për t’u pasuar me fjalimin e kryetarit Lladrovci, ku tha:
I nderuari Kryesues i Kuvendit të Drenasit, z. Hajdari Të nderuara asambliste dhe asamblistë, I nderuari nënkryetar Shala, përfaqësues të ekzekutivit të komunës së Drenasit, Të dashur familjarë të dëshmorëve, invalidë e veteranë të UÇK-së, Komandant i Stacionit Policor të Drenasit, Përfaqësues të Bashkësive fetare, Qytetarë të komunës së Drenasit, Zonja e zotërinj,
5, 6 dhe 7 Marsi, përbëjnë Epopenë e Ushtrisë Çlirimtare të Kosovës.
Tri ditët e kësaj Epopeje, janë tri ditët e qëndresës, ditë ku farkohej historia më e ndritshme e popullit të Kosovës dhe qytetarëve liridashës.
Krisma e armëve të Komandantit tonë legjendar, Adem Jasharit, do të dëgjohej larg, anekënd globit. Krisma që do të jehonin në çdo zemër liridashëse, në çdo zemër shqiptare atdhetare. Krismë që do ta egërsonte edhe më shumë bishën okupatore.
Krismat e armëve të Bacit Shaban, Ademit e Hamzës, do të jehonin fuqishëm edhe në shtëpitë tona këtu, në komunën e Drenasit. Krisma të cilat zgjuan dhe fuqizuan ndërgjegjen atdhetare, me vendosmërinë e paparë deri atëherë, vdekje ose çlirim.
Epopeja është ngjarje që rizgjoi historinë e frymës skënderbejane, për liri e pavarësi, kundër robërisë, përbuzjes dhe shtypjes.
Asgjë më nuk do të ishte njëjtë pas 5, 6 e 7 Marsit. Ishte frymë dhe energji shekullore e përqendruar te Komandanti legjendar Adem Jashari.
Po jepej mesazhi se jemi gjallë e krenar në tokën tonë, përgjithmonë.
Zonja e zotërinj,
Para 26 vitesh, në Prekazin heroik, në Drenicën e qëndresës, është zhvilluar ngjarja më madhore e popullit të Kosovës e cila prodhoi shtetin tonë, Republikën e Kosovës.
Komandanti legjendar, Adem Jashari dhe familja Jashari, dëshmoi si asnjëherë më parë, sa i fortë e i madh ishte vullneti ynë për liri. Ishte vullnet që asnjë forcë më nuk mund ta ndalte, deri në çlirimin e Kosovës.
Sot, me këtë Seancë solemne, jemi këtu, për të shprehur nderimin tonë të thellë, edhe për të gjithë kontribuuesit e lirisë tonë gjatë një shekulli.
Për të nderuar të gjithë ata që dhanë gjithçka për këtë ditë, në rrugën për Kosovën e lirë.
Për Kosovën, heronjtë, dëshmorët dhe martirët e kombit dhanë më të çmueshmën që patën, jetën e tyre.
Ditët e rënda për çlirimtarët nuk kanë mbaruar. Armiqtë tanë nuk po ndalen. Kosova jonë nuk përkulet.
Sot, me ne këtu nuk janë heronjtë e luftës dhe paqes, Hashim Thaçi, Kadri Veseli, Jakup Krasniqi, Rexhep Selimi dhe çlirimtarët tjerë, por, presim që drejtësia ta thotë fjalën e vet dhe ata të kthehen si gjithmonë fitimtar.
Çdo Mars me pranverën do të na sjell emocionet dhe ndjenjat më fisnike të përkushtimit të përbashkët, njëherësh kujtime krenare, sepse, në hapat e parë të rrugës për çlirim, pata fatin të ecim së bashku.
Historia për Komandantin legjendar, Adem Jasharin dhe Jasharajt, kishte rezervuar vendin më të lartësuar dhe më shembullor në historinë e kombit tonë. Vend madhështor të cilin nuk e hasim te asnjë komb tjetër, për çlirimin, flijimin me tërë familje, prej Bacit Shaban dhe Nënës Zahide, 74 vjeçar, deri te Blerina 7 vjeç, Fatimja 9 vjeç, Igballja 11 vjeç, Blerimi 12 vjeç, Kushtrimi 13 vjeç, i cili edhe zbrazi armën e fundit në këtë epope e cila shënjonte ardhjen e lirisë tonë, të cilën sot e gëzojmë.
Duke ecur vitet, shkëlqimi i Epopesë së UÇK-së, po rritet.
Si asnjë herë më parë, për Epopenë po flitet njëzëri, ashtu, siç ishin njëzëri çlirimtarët me popullin, rreth flamurit të përbashkuar.
Armiqtë e Republikës tonë, duhet ta dinë se ne punojmë dhe jetojmë sot të lirë, por, kurdo që nevojitet, me vetëmohim, do ta mbrojmë kujtimin, sakrificën dhe vlerën e arritur bashkë me aleatët tanë nga madhështia i Epopesë.
Ne kemi qenë këtu, nga fillimi, këtu do të jemi, deri në fund, sepse, lidhja jonë me tokën, është e përjetshme, ashtu siç është i përjetshëm kujtimi për marsin legjendar.
Lavdi heronjve, dëshmorëve dhe martirëve të lirisë!
Lavdi Komandantit legjendar Adem Jasharit dhe Jasharajve legjendar!
Lavdi e përjetshme Ushtrisë Çlirimtare të Kosovës!
Ju faleminderit!
