Mbahet Sofra Poetike “Ymer Elshani” 2023
Të enjten, në Sallën e Kulturës në Drenas, është mbajtur manifestimi letrat tradicional, Sofra Poetike “Ymer Elshani” 2023, aktivitet letrat ky i organizuar nga Drejtoria për Kulturë, Rini dhe Sport në bashkëpunim me Karvanin e Shkrimtarëve për Fëmijë “Agim Deva”. Në 24 vjetorin e rënies së shkrimtarit Ymer Elshani, edhe në këtë manifestim është bërë përurimi i kompletit prej katër veprave të zgjedhura nga krijimtaria letrare e Ymer Elshanit si dhe libri për fëmijë i ilustruar me fotografi “Kërpudha Magjike”.
Në këtë manifestim letrar, merrnin pjesë, nënkryetari i Komunës, Arben Shala, drejtoresha për Kulturë, Rini dhe Sport, Enkela Dema, shkrimtar, krijues të poezisë, e bija e shkrimtarit Elshani, Teuta Elshani, drejtor shkollash, mësimdhënës, nxënës e familjar.
Nënkryetari Shala, para të pranishmëve tha se “shkrimet e Ymer Elshani nxisin ndjenjë, shtyjnë lexuesit të mendojnë, të bëhen kuriozë, ta shikojnë botën që i rrethon me një vështrim më të thellë. Ne shkrimet e tij shihet se autori gjen frymëzim në të zakonshmen, dhe të jashtëzakonshmen, për të krijuar vepra që përveç kënaqësisë që sjellin, përcjellin vlera edukative e arsimore. Me fuqinë e fjalëve shkrimtari Elshani ka krijuar shkrime që magjepsin dhe do të vazhdojnë të magjepsin mendjet dhe zemrat e lexuesve”, ka thënë nënkryetari Shala.
Ndërsa drejtoresha e DKRS-së, Eneka Dema, para të pranishmëve tha se “Ideja për bashkimin e krijuesve dhe dashamirës të artit të shkruar rreth një sofre të përbashkët, në trevën e këngës, të fjalës dhe pushkës zë fill që në vitin 1994. Atëherë, iniciativa e disa të rinjve të Drenicës, nga ideja u shndërrua në realitet, në manifestim poetik të përmasës së Kosovës duke hapur kështu shtigje të reja të shpërthimit të fjalës së shkruar edhe në rrethana të atëhershme. Kështu, jo vetëm që u plotësua një boshllëk në spektrin kulturorë të Drenasit dhe Drenicës, por u thye heshtja, që ngulfaste fjalën artistike. Ideja e shpaluar kishte objektiv t’i tubonte poetët dhe shkrimtarët nga gjitha trevat e Kosovës në vendin ku kishte traditë, fjala poetike, kënga, burrëria dhe trimëria dhe në ketë rast u hap një dritare për kultivuesit e vlerave të qëndrueshme letrare, por edhe një mundësi e mirë për emra të rijnë të letrave shqipe. Në vitin 1994, në fshatin Qëndresë u mbajt takimi i parë, me shkrimtarë, ku u vendos që ky manifestim të quhet ,,Sofra poetike” dhe të jetë tradicional”, tha mes tjerash drejtoresha Dema.
Ne këtë manifestim, nxënësit e shkollës fillore “Rasim Kiqina” kanë paraqitur recital me vargje kushtuar fëmijëve të rënë në masakrën e Poklekut, të përgatitur nga mësimdhënësja Albulena Elshani.
Dy kumtesa, përkatësisht fjalë rasti patën edhe dy shkimtarët që ndihmuan botimin e veprave të përzgjedhura të Ymer Elshanit, prof.dr. Anton Nikë Berisha dhe prof..dr. Xhevat Syla. Ndërsa para të pranishmëve fjalë rasti ka pasur edhe vajza e shkrimtarit Ymer Elshani, Teuta Elshani, e cila edhe ka financuar botimin e kompletit të librave.
Në këtë manifestim letrar i deklaruan 40 poezi, ndërsa u lexuan 14 prej tyre.
Nga juria profesionale, vendi i tretë u nda për poezinë “Pjetër Bogdani” me shifrën “Grof Deda, të Ismet Krasniqi.
Vendi i dytë, poezia “Sytë e Dashurisë” me shifrën “Zogu i dashuruar” të Idriz Berisha.
Vendi i parë, poezia, “Poeti i Pavdekshëm” kushtuar Ymer Elshani me shifrën “Poeti i Luftës” të Mehdi Krasniqi.
Ndërsa sipas jurisë, çmimi special i Sofrës Poetike “Ymer Elshani ju nda Gjon Gjergjaj me poezinë “Bota ka pamjen e luftëtarit të Kosovës”.
