Kryetari Lladrovci pret në takim përfaqësuesit e angazhuar për projektin e ngrohjes së qytetit të Drenasit
Kryetari i Komunës së Drenasit, Ramiz Lladrovci, së bashku me stafin, ka pritur në takim përfaqësuesit e kompanisë “INF10 Planet”, Driton Hyseni, zëvendës lider, Avni Sfishta dhe Fahrush Azemi, të cilët janë të angazhuar në projektin “Sistemet e Ngrohjes Qendrore në Kosovë; SF dhe VNMS”, ku Drenasi është përfituese e këtij granti nga Banka Evropiane për Rindërtim dhe Zhvillim (BERZH) për realizimin e ngrohtores së qytetit.
Kryetari Lladrovci, ka falënderuar të pranishmit dhe ka shprehur gatishmërinë e plotë për bashkëpunim për realizimin e këtij projekti të rëndësishëm për qytetarët e Komunës së Drenasit. Në këtë takim është diskutuar për hapat që do të ndërmerren për realizmin e këtij projekti, si ndarja e lokacionit për ndërtimin e stacionit të ngrohtores, formimin e një grupi punues që do të bashkëpunoj me kompaninë IPF10 Planet.
Zëvendës lideri i kompanisë, Driton Hyseni, bëri të ditur së kompania në fjalë, do të bëjë Studimin e Fizibilitetit të këtij projekti dhe vlerësimin e ndikimit mjedisor e social (VNMS-në). Hyseni ka falënderuar kryetarin Lladrovci për pritjen dhe bashkëpunimin për realizimin e këtij projekti.
Ndryshe, Komuna e Drenasit është në mesin e 8 Komunave të Kosovës, përfituese e Grantit nga BERZH-i, për realizimin e projektit të ngrohtores së qytetit, një nga prioritetet primare të qeverisjes së kryetarit Lladrovci. Ky projekt financohet nga Banka Evropiane e Investimeve (EIB) dhe Banka Evropiane për Rindërtim dhe Zhvillim dhe do të zgjas 18 muaj.
