Këshilli Komunal për Siguri në Bashkësi (KKSB) ka mbajtur mbledhjen e parë të rregullt për këtë vit.
Mbledhjen e kryesoi nënkryetari i Komunës së Drenasit, Nazmi Hasi.
Të pranishëm ishin anëtarë të KKSB-së apo përfaqësuesit e tyre dhe përfaqësues nga LMT e KFOR-it Italian.
Pikat e rendit të ditës të cilat u diskutuan ishin:
1. Procesverbali i mbledhjes së rregullt të KKSB-së të mbajtur me 17.12.2020, Linku: https://gllogoc.rks-gov.net/wp-content/uploads/2020/12/Procesverbali-i-mbledhjes-se-KKSB-17.12.2020.pdf
2. Draft plani i punës së KKSB-së për punën e vitit 2021;
3. Draft orari i punës së KKSB-së për vitin 2021;
4. Njoftim lidhur me menaxhimin e vërshimeve të fundit;
5. Përgatitjet nga Komisioni Komunal i Zgjedhjeve – KKZ – Drenas, për zgjedhjet parlamentare;
6. Informim lidhur me fillimin e gjysmëvjetorit të dytë të vitit shkollor 2020/2021;
7. Të ndryshme.
Procesverbali i mbledhjes së fundit u miratua unanimisht dhe pa ndonjë vërejtje. U miratua edhe plani i punës së KKSB-së për punën e vitit 2021 si dhe draft plani i punës së KKSB-së për punën e vitit 2021.
Për pikën e katërt, drejtoresha e Drejtorisë për Shërbime Publike dhe Emergjencë, Lumnije Krapi, i njoftoi të pranishmit për masat e marra nga kjo drejtori dhe për evidentimin e dëmeve të shkaktuara në ekonomitë familjare, në bujqësi dhe në biznese dhe hartimin e raportit përfundimtar në të cilin janë evidentuar të gjitha dëmet e shkaktuara. Raporti është dërguar në ministrinë përkatëse me qëllim të kompensimit eventual nga fondi i caktuar për këtë çështje. Drejtoresha Krapi njoftoi edhe për ndërhyrjet e realizuar nga kjo drejtori pas vërshimeve dhe për bashkëpunimin e mirë me FSK-në dhe AME-në për evitimin e rrezikut të përgjithshëm. Pjesëmarrësit rekomanduan një mbikëqyrje dhe kontroll më të mirë të projekteve të cilat realizohen në komunën tonë me qëllim që në të ardhmen të mos ketë pasoja të mëdha nga vërshimet.
Për pikën e pestë, kryesuesi i KKZ-së në Drenas, Burim Jonuzi, tha se KKZ në Drenas ka përfunduar shumicën e përgatitjeve të nevojshme dhe për pastrimin e listave të votuesve nga KQZ. Gjithashtu tha se subjektet politike janë informuar në lidhje me rregullat që duhet respektuar për një mbarëvajtje të procesit zgjedhor. Jonuzi u përgjigj shumë pyetjeve që kishin të bëjnë me votimin e personave të izoluar dhe të atyre që fizikisht nuk mund të marrin pjesë në votim si dhe për masat shtesë për mbrojtje nga pandemia gjatë procesit zgjedhor.
Për pikën e gjashtë, drejtori i Drejtorisë Komunale për Arsim, Muhamet Gjoka, tha se gjysmëvjetori i dytë ka filluar me skenarin A dhe se shkollat janë të pajisura me material higjienik e dezinfektantë. Ndër të tjerash tha se u ka kërkuar përgjegjësve në shkolla se në objektet shkollore në të cilat mbahen fushatat elektorale duhet të dezinfektohen çdo herë përveç dezinfektimeve të rregullta.
Për të ndryshme, u diskutuan kërkesat e KLSP Komoran për vendosje të pengesave në rrugë pranë QMF-së, si dhe funksionimin e kamerave po në Komoran, dhe për çështje tjera të ngritura nga pjesëmarrësit në lidhje me qentë endacakë, si dhe vendosja e kamerave në lokacione me interes për qytetarë, etj. U konkludua se kamerat në Komoran janë funksionale dhe se as Policia e as DShPE nuk kanë informacion se kamerat janë jashtë funksionit. Ndërsa për pengesat në rrugë do të shqyrtohen mundësitë për vendosjen e tyre pas përfundimit të procedurave tenderuese, gjithmonë në përputhje me ligjin përkatës i cili rregullon këto çështje.