Komuna e Drenasit në bashkëpunim me Kompaninë Rajonale të Mbeturinave (KRM) dhe Green Art Center (GAC) po vazhdojnë projektin për ndarjen e mbeturinave në burim. Pas rritjes së kapaciteteve për grumbullim të mbeturinave të riciklueshme të amvisërive është shtuar intensiteti i punës të kompanisë për transportim deri në stacion transferim, vend në të cilin ka filluar edhe seleksionimi i letrës, plastikës dhe kanaqeve si dhe paketimi i tyre në dëngje.
Në stacion transferim kompania “Pastrimi” ka siguruar presën për paketimin e mbeturinave të riciklueshme me të cilën do të fillojë paketimi i mbeturinave të riciklueshme. Kjo do të ndikojë në uljen e sasisë së mbeturinave të përziera të cilat përfundojnë në deponi.
Projekti “Zbatimi i Skemës së Ndarjes së Mbeturinave të Riciklueshme në Burim” është duke marrë formën e duhur në Komunën tonë, me të cilin synohet që në të ardhmen e afërt të përfshihet i tërë territori i Komunës.
